مشرف دور میں سب سے زیادہ سرمایہ کاری ہوئی، عمران خان

لاہور(اُردوپوائنٹ اخبارتازہ ترین۔19 جولائی 2018ء) : پاکستان تحریک انصاف کے چیئرمین عمران خان نے کہا ہے کہ مشرف دور میں سب سے زیادہ سرمایہ کاری ہوئی، ڈالرکی قدر بڑھنے سے عوام بیٹھے بیٹھے غریب ہوگئی،10سالوں میں ملکی قرضے 27ہزار ارب ہوگئے،کیونکہ زرداری اور نوازشریف نے مک مکا کررکھا تھا،الیکشن میں تاجربرادری اب ہمارا ساتھ دے۔انہوں نے کراچی میں تاجر کنونشن سے خطاب کرتے ہوئے کہا کہ جتنا روپیہ گرے گا اس رفتار سے قرضے بڑھیں گے۔

اس کے ساتھ ہرچیز مہنگی ہوجائیں گی۔ پٹرولیم مصنوعات کی قیمتوں میں اضافہ ہوگا۔روپے کی قدر میں کمی ہوئی ہے جبکہ ڈالر 128روپے کا ہوگیا ہے۔ایک مہینے میں 20فیصد ختم ہوگیا ہے۔ یعنی اگر 100روپے پڑے ہیں تووہ 10فیصدکم ہوئے۔اب 45روپے رہ گئے ہیں۔ایک مہینے میں روپے کی قدرگرنے سے قرضے ایک ہزار ارب بڑھ گئے ہیں۔

(جاری ہے)

قوم بیٹھے بیٹھے غریب ہوگئی۔مسئلہ صرف اداروں کی تباہی کی گئی ہے۔

انہوں نے کہا کہ تاجر کمیونٹی کوچاہیے کہ شریف فیملی کوچھوڑ کرہمارے ساتھ کھڑی ہوجائے۔ہم یہ سنتے آئے کہ ن لیگ کی تجربہ کار ٹیم ہے لیکن حال سب کے سامنے ہے۔معاشی خوشحالی گورننس سے آتی ہے۔ گورننس سسٹم نہ ہونے سے سرمایہ کاری نہیں ہوتی۔ماضی میں معاشی ترقی صرف اشتہاروں میں دکھائی گئی۔انہوں نے کہا کہ جس پاکستانی لیڈر کا جینا مرنا پاکستان میں نہیں ، ان کا علاج ، شاپنگ اور چھٹیاں باہر ہیں وہ کبھی بھی تبدیلی نہیں لاسکتے۔

انہوں نے کہا کہ دنیا میں کہیں ایسا نہیں ہوتا کہ تین بار وزیراعظم رہنے والے وزیراعظم کے بیٹے اربو ں پتی اور جب پوچھوکہ پیسا کہاں سے آیا وہ کہتے ہیں ہم توپاکستانی شہری ہی نہیں ہیں۔انہوں نے کہا کہ قوم کواٹھانے کیلئے کام شروع کرنا ہے توپہلے خود پراپلائی کرو۔عمران خان نے کہا کہ آصف زرداری کی جائیداد باہر اور نوازشریف کی جائیداد بھی باہر ہے۔کیونکہ دونوں نے مک مکا کررکھا تھا۔اس لیے پاکستان کا یہ حال ہوا ہے۔10سالوں میں قرضہ6ہزار ارب سے 27ہزار ارب تک چلا گیا ہے۔چیئرمین پی ٹی آئی نے کہا کہ ہم حکومت میں آکر ٹیکس کونیچے لے کرآئیں گے۔انہوں نے کہا کہ پچھلے دور میں اڑھائی ارب کی سرمایہ کاری ہوئی جبکہ مشرف دور میں 20ارب ڈالر کی سرمایہ ہوئی۔