کراچی میں انسداد تجاوزات آپریشن کا دائرہ کار بڑھایا جائے گا، میئر کراچی

ہفتہ 17 نومبر 2018 20:36

کراچی (اُردو پوائنٹ اخبارتازہ ترین - آن لائن۔ 17 نومبر2018ء) میئر کراچی وسیم اختر نے کہا ہے کہ کراچی میں انسداد تجاوزات آپریشن کا دائرہ کار بڑھایا جائے گا۔

(جاری ہے)

کراچی کی انسدادِ دہشت گردی کی عدالت میں سانحہ 12 مئی کے دو مقامات میں پیشی کے بعد میئر کراچی وسیم اختر نے میڈیا سے گفتگو کرتے ہوئے کہا کہ لوگ رضاکارانہ طور پر خود تجاوزات ختم کر رہے ہیں، کراچی میں جس کا جو دل چاہتا ہے وہ کرتا ہے، ’کراچی سب کے لیے مفت ہے‘ کا رجحان بن گیا ہے، فٹ پاتھ لوگوں کے چلنے کے لئے ہوتا ہے غیر قانونی تجاوزات کے لئے نہیں، کے ایم سی اپنی حدود میں تجاوزات کے خلاف آپریشن کا دائرہ کار بڑھائے گی۔

میئر کراچی وسیم اختر کا کہنا تھا کہ اگر شہر میں تجاوزات پھر سے شروع ہوئی تو وہاں کا اینٹی انکروچمنٹ افسر ذمہ دار ہوگا، سپریم کورٹ نے کنٹونمنٹ کو آرڈر کیا کہ میئر کراچی کے ساتھ مل کر تجاوزات ہٹائیں، ہم نے کنٹونمنٹ کے علاقے میں بھی انکروچمنٹ ختم کی ہے، چیف جسٹس کی تبدیلی کے بعد بھی تجاوزات کے خلاف عدالتی حکم برقرار رہے گا۔