جامعہ کراچی، ایم اے / ڈبل ایم اے پرائیوٹ اور ریگولرکے امتحانی فارم جمع کرانے کی تاریخ میں توسیع

اتوار 16 جون 2019 15:50

کراچی۔ (اُردو پوائنٹ اخبارتازہ ترین - اے پی پی۔ 16 جون2019ء) ایم ای/ ڈبل ایم اے پرائیوٹ اور امپرومنٹ آف ڈویژن کے لئے سالانہ امتحانی فارم جمع کرانے کی تاریخ میں21 جون جبکہ ایم اے ریگولر سال اول وآخر کے امتحانی فارم جمع کرانے کی تاریخ میں20 جون2019ء تک توسیع کردی گئی ہے۔ جامعہ کراچی کے ناظم امتحانات پروفیسر ڈاکٹر ارشد اعظمی کے اتوار کو جاری کردہ اعلامیہ کے مطابق ایم اے پرائیوٹ کے طلبہ اپنے امتحانی فارم 4400 روپے فیس کے ساتھ جبکہ ایم اے ریگولر کے طلبہ اپنے امتحانی فارم6000 روپے فیس کے ساتھ جمع کراسکتے ہیں۔

(جاری ہے)

طلبہ اپنی امتحانی فیس ایچ بی ایل،یوبی ایل،نیشنل بینک آف پاکستان ،ایم سی بی اور سندھ بینک کی کسی بھی برانچ میں جمع کراسکتے ہیں۔امتحانی فارم اور بینک وائوچر جامعہ کراچی کی ویب سائٹ سے حاصل کئے جاسکتے ہیں۔ واضح رہے کہ ایسے طلباوطالبات جو 2012 ء یا اس سے قبل کی رجسٹریشن/ انرولمنٹ کے حامل ہیں انہیں امتحانی فیس کے علاوہ 5000 روپے اضافی چارجز بھی جمع کرانے ہوں گے۔ ایم اے ریگولر وپرائیوٹ کے سالانہ امتحانات 2 جولائی 2019ء سے شروع ہوں گے۔ واضح رہے کہ امتحانی فارم جمع کرانے کی تاریخ میں مزید توسیع نہیں کی جائے گی۔