پی آئی اے، کوالالمپور کے لئے پروازوں کا دوبارہ آغاز

پیر 14 اکتوبر 2019 18:45

کراچی۔ (اُردو پوائنٹ اخبارتازہ ترین - اے پی پی۔ 14 اکتوبر2019ء) پاکستان انٹرنیشنل ائیرلائن (پی آئی ای) نے کوالالمپور کے لئے پروازوں کا دوبارہ آغاز کر دیا۔ یہاں جاری کردہ اعلامیہ کے مطابق پہلی پرواز PK894 تین سو سے زائد مسافروں کولے کر پیر کو اسلام آباد سے روانہ ہوئی۔ اسلام آباد سے کوالالمپور کے ہفتہ وار دو پروازیں بروز سوموار اور جمعہ کو روانہ ہوں گی۔

کوالالمپور کے لئے 8 ماہ کے بعد پروازیں دوبارہ شروع کی گئی ہیں۔

(جاری ہے)

ترجمان نے بتایا کہ فضائی حدود کی بندش کے باعث پروازیں معطل کی گئی تھیں۔ پروازوں کے دوبارہ شروع کرنے پر کاروباری حلقوں اور ملائیشیا میں مقیم پاکستانیوں نے خیر مقدم کیا ہے۔ اس موقع پر اپنے خیالات کا اظہار کرتے ہوئے چیف ایگزیکٹو آفیسر پی آئی اے ائر مارشل ارشد ملک نے کہا کہ کاروباری ضرورت کو مد نظر رکھتے ہوئے کوالالمپور کے لئے پروازوں کی تعداد میں اضافہ کیا جائے گا۔ انہوں نے پی آئی اے کے متعلقہ شعبہ جات کو مسافروں کو ہر ممکن سہولیات فراہم کو یقینی بنانے کی ہدایت کیں۔