ڈپٹی گورنر اسٹیٹ بینک کا عہدہ بھی آئی ایم ایف کے سابق عہدیدار کو تفویض

کراچی(اُردو پوائنٹ اخبارتازہ ترین - آن لائن۔ 21 جنوری2020ء) اسٹیٹ بینک کے ڈپٹی گورنر کے عہدے پر بھی آئی ایم ایف کے سابق عہدے دار کی تقرری کردی گئی۔فنانس ڈویژن نے مرتضی سید کی بطور ڈپٹی گورنر اسٹیٹ بینک تقرری کا نوٹیفکیشن جاری کردیا ہے۔ مرتضی سید تقرری سے قبل آئی ایم ایف میں پالیسی ، اسٹریٹجی اینڈ ریویو ڈویڑن کے ڈپٹی چیف کے عہدے پر خدمات انجام دے رہے تھے، انھو ں نے 2004 میں فنڈ میں شمولیت اختیار کی اور اس سے قبل مالی امور اور ایشیا اور بحر الکاہل کے محکموں میں کام کر چکے ہیں۔

(جاری ہے)

اس سے قبل وہ چین میں آئی ایم ایف کے نائب رہائشی نمائندے تھے۔ وہ آئی ایم ایف پروگراموں اور کولمبیا ، قبرص ، یورو ایریا ، کوریا اور جاپان سمیت مختلف ابھرتی ہوئی مارکیٹوں اور جدید معیشتوں کی نگرانی میں بھی شامل رہے۔ان کے تجزیاتی کام میں معاشی و اقتصادی روابط ، مالی اور مالیاتی پالیسی ، مالی بحران ، سرمایہ کاری ، آبادیاتی آبادی اور عدم مساوات شامل ہیں۔ آئی ایم ایف میں شمولیت سے قبل مرتصی سید نے لندن میں انسٹی ٹیوٹ برائے مالیاتی مطالعات اور اسلام آباد کے ہیومن ڈیولپمنٹ سینٹر میں کام کیا۔ انھوں نے یونیورسٹی آف آکسفورڈ سے معاشیات میں پی ایچ ڈی کی ہے۔