حکومت کی درآمد کردہ مزید گندم اور چینی پاکستان پہنچنا شروع ہو گئی، چوتھا جہاز بھی پورٹ قاسم پر لنگر انداز ہوگیا

درآمدی چینی مارکیٹ سے کم ریٹ میں فروخت کی جائے گی، ٹی سی پی سپلائی سے مارکیٹ میں چینی کی قیمتیں کم ہوں گی، ڈاکٹر ریاض میمن

ہفتہ 31 اکتوبر 2020 15:09

حکومت کی درآمد کردہ مزید گندم اور چینی پاکستان پہنچنا شروع ہو گئی، چوتھا جہاز بھی پورٹ قاسم پر لنگر انداز ہوگیا
کراچی(اُردو پوائنٹ اخبارتازہ ترین - این این آئی۔ 31 اکتوبر2020ء) ملک میں آٹا چینی کے بحران پر قابو پانے کیلئے حکومت کی درآمد کردہ مزید گندم اور چینی پاکستان پہنچنا شروع ہو گئی۔ٹریڈنگ کارپوریشن آف پاکستان (ٹی سی پی)کی درآمد کردہ گندم کا چوتھا جہاز 52 ہزار 170 میڑک ٹن گندم لے کر پورٹ قاسم پر لنگر انداز ہو گیا ، مزید 52 ہزار 200 میڑک ٹن چینی بھی کراچی پہنچ گئی ہے،توقع ہے درآمدی چینی آنے سے ملک میں چینی کی کمی پر قابو پایا جا سکے گا۔

ٹی سی پی حکام کے مطابق رواں ماہ کے دوران مجموعی طور پر درآمد کی جانے والی گندم میں سے خیبرپختونخوا نے اب تک ایک لاکھ 10 ہزار میٹرک ٹن گندم اٹھا لی ہے جب کہ حکومت پنجاب نے بھی درامد کی گئی گندم سے 56 ہزار 457 میٹرک ٹن گندم لی ہے۔حکام کے مطابق چوتھے جہاز سے آنے والی گندم خیبرپختونخوا حکومت لے گی۔

(جاری ہے)

ٹی سی پی کے مطابق 52 ہزار 200 میٹرک ٹن درآمدی چینی لے کر دوسرا جہاز کراچی پہنچ گیا ہے، درآمد کی گئی چینی حکومت پنجاب کو دی جائے گی جو مارکیٹ ریٹ سے کم پر فروخت کی جائے گی۔

چیئرمین ٹی سی پی ڈاکٹر ریاض میمن کا کہنا ہے کہ اب تک 77200 ٹن چینی درآمد کر چکے ہیں، پہلے جہاز سے 3500 میٹرک ٹن چینی ڈسچارج کی جا چکی ہے۔ڈاکٹر ریاض میمن کا کہنا ہے کہ درآمدی چینی مارکیٹ سے کم ریٹ میں فروخت کی جائے گی، ٹی سی پی سپلائی سے مارکیٹ میں چینی کی قیمتیں کم ہوں گی۔

کراچی میں شائع ہونے والی مزید خبریں