امیرالبحر ایڈمرل محمد امجد خان نیازی کو لیجن آف دی ترکش آرمڈ فورسز کا اعلیٰ اعزاز تفویض

جمعرات 3 دسمبر 2020 20:07

کراچی(اُردو پوائنٹ اخبارتازہ ترین - این این آئی۔ 03 دسمبر2020ء) سربراہ پاک بحریہ ایڈمرل محمد امجد خان نیازی کو ترک بحریہ کے سربراہ عدنان ازبال نے لیجن آف دی ترکش آرمڈفورسز کا عسکری اعزاز تفویض کیا۔ ترکی کے دورے کے دوران امیرالبحر نے وزیر برائے قومی دفاع، ترک بری اور بحری فوج کے کمانڈرز اور دفاعی انڈسٹریز کے صدر سے ملاقاتیں کیں۔ترک بحریہ کے ہیڈکوارٹرز آمد پرایڈمرل محمد امجد خان نیازی کو گارڈ آف ٓنر پیش کیا گیا اور ایک پروقارتقریب میںکمانڈر ترک بحریہ نے سربراہ پاک بحریہ کو لیجن آف دی ترکش آرمڈ فورسز کااعزاز تفویض کیا۔

ملاقات کے دوران معززین نے دونوں ممالک کی بحری فورس کے مابین تعلقات کے فروغ، باہمی دلچسپی کے امور اور بحری اشتراک کے معاملات پر گفتگو کی۔

(جاری ہے)

سربراہ پاک بحریہ کو ترکش نیول فورسز کے متعلق تفصیلی بریفنگ دی گئی۔ ایڈمرل محمد امجد خان نیازی نے ترکش جنرل اسٹاف ہیڈکوارٹرزانقرہ میں وزیر برائے قومی دفاع ہولوسی اکار اور ترک بری فوج کے کمانڈر جنرل یاسر گلر سے ملاقاتیںکی۔

نیول چیف نے پریزیڈینسی آف ڈیفنس میں دفاعی انڈسٹری کے صدر اسماعیل دمیر سے بھی ملاقات کی۔ملاقات کے دوران خطے کی سیکیورٹی اور باہمی دلچسپی کے امور اور دفاعی اشتراک کے معاملات زیر غور رہے۔ایڈمرل محمد امجد خان نیازی نے میری ٹائم سیکٹر میں امن استحکام کی بقاء کے لیے ترک فوج کے کردار کو سراہا۔انھوں نے مزار اتاترک پر پھولوں کی چادر چڑھائی اور اعزازی کتاب میں اپنے تاثرات قلم بند کیے۔ترک معززین نے بحر ہند میں امن و استحکام کے قیام کے لیے پاک بحریہ کے کردار کو سراہا۔امیرالبحر کا حالیہ دورہ دونوں ممالک کے مابین بالعموم اور بحری افواج کے درمیان بالخصوص اشتراک اور تعاون کو فروغ دینے میں کلیدی کردار ادا کریگا۔