ٓوزیراعلیٰ سندھ کا فرائض کی انجام دہی کے دوران 2355 شہید پولیس اہلکاروں کو خراج تحسین پیش

کراچی (اُردو پوائنٹ اخبارتازہ ترین - آن لائن۔ 04 اگست2021ء) وزیراعلیٰ سندھ سید مراد علی شاہ نے فرائض کی انجام دہی کے دوران 2355 شہید پولیس اہلکاروں کو خراج تحسین پیش کرتے ہوئے کہا کہ وہ ہمارے ہیرو زتھے اور دہشتگردی کے خلاف جنگ میں اپنی جانوں کا نذرانہ پیش کیا۔یوم شہدائے پولیس کے موقع پر وزیراعلیٰ سندھ نے اپنے پیغام میں کہا کہ ہمیں سندھ پولیس پر فخر ہے۔

2355 پولیس اہلکاروں نے دہشتگردی کے خلاف جنگ میں اپنی جانوں کا نذرانہ دے کر صوبے خصوصاً کراچی شہر میں امن کی بحالی میں اہم کردار ادا کیا۔مرادعلی شاہ نے کہا کہ میں شہداء کی جرات کو سلام پیش کرتا ہوں ۔ ہماری پولیس دہشتگری کے خاتمے، جرائم اور قدرتی آفات سے نبرد آزما ہونے کے لیے ہر وقت تیار ہے۔ انہوں نے کہا کہ کورونا وبا کے دوران پولیس کے جوانوں نے اہم مقامات پر فرائض انجام دیئے اور38 پولیس اہلکارڈیوٹی کے دوران کورونا کی وبا کا شکار ہو کرشہید ہوئے۔

(جاری ہے)

وزیراعلیٰ سندھ نے کہا کہ سندھ پولیس کی بہترین خدمات اور لگن کو مدنظر رکھتے ہوئے اور صوبے کے عوام کے ساتھ ان کی وابستگی کے باعث ہم نے پولیس کے محکمہ کو بہترین تنخواہ پیکجز اور دیگر فوائد سے مضبوط کیا ہے۔ انہوں نے کہا کہ میری حکومت شہید پولیس اہلکاروں کے خاندانوں کی دیکھ بھال کرتی رہے گی جس کے لیے ایک مناسب طریقہ کار تیار کیا گیا ہے۔انہوں نے شہید پولیس اہلکاروں کو سلام پیش کیا اور ان کے لیے فاتحہ خوانی کی