میری سب سے بڑی کامیابی میری بیوی ہے، یاسر حسین

کراچی (اُردو پوائنٹ اخبارتازہ ترین - این این آئی۔ 13 جون2025ء)یاسر حسین نے سوشل میڈیا پر تنقید کا جواب دیتے ہوئے کہا ہے کہ میری سب سے بڑی کامیابی میری بیوی ہے۔نامور اداکار، میزبان اور ہدایتکار یاسر حسین نے حالیہ انٹرویو میں اپنی اہلیہ اقرا عزیز سے متعلق سوشل میڈیا پر ہونے والی تنقید کا دوٹوک اور خلوص سے بھرپور جواب دے کر مداحوں کے دل جیت لیے۔

یاسر حسین نے فلم کراچی سے لاہور سے شہرت حاصل کی اور کئی ڈراموں اور فلموں میں اداکاری کے جوہر دکھائے۔حال ہی میں نجی ٹی وی کے پروگرام میں مہمان بنے جہاں ان سے ان کے متنازع بیانات اور سوشل میڈیا پر ہونے والی تنقید کے بارے میں سوال کیا گیا۔میزبان کے سوال پر یاسر حسین نے نہایت پرخلوص انداز میں کہا کہ کسی نے میرے کمنٹ کے نیچے لکھا کہ میری زندگی کی واحد کامیابی میری بیوی ہے اور میں کہتا ہوں کہ یہ سچ ہے، اقرا میری سب سے بڑی طاقت ہے میں جتنے بھی کام کرتا ہوں وہ اس لیے ممکن ہوتے ہیں کیونکہ اقرا گھر اور بچے کو سنبھال رہی ہوتی ہے، ہر مرد کی سب سے بڑی کامیابی اس کی بیوی ہی ہونی چاہیے۔

(جاری ہے)

انہوں نے مزید کہا کہ اکثر لوگ خواتین کے کردار اور قربانیوں کو کم تر سمجھتے ہیں، لیکن اصل میں وہی اصل سہارا ہوتی ہیں۔یاد رہے کہ سوشل میڈیا پر یاسر حسین کو اکثر اقرا عزیز کی شہرت سے جوڑا جاتا ہے اور کچھ صارفین نے یہاں تک کہا کہ یاسر کی پہچان صرف ان کی اہلیہ کی وجہ سے ہے، خاص طور پر اداکارہ نادیہ خان کے ساتھ تنازع کے بعد ان پر تنقید میں اضافہ ہوا۔سوشل میڈیا پر کئی افراد نے تبصرہ کیا کہ یاسر کو اقرا جیسی مشہور بیوی مل گئی، ورنہ ان کا اپنا کوئی خاص ہِٹ پراجیکٹ نہیں۔یاسر حسین کے اس بیان کے بعد بہت سے صارفین نے ان کے خلوص اور بیوی کے لیے عزت کے جذبے کو سراہا، کئی مداحوں نے کہا کہ معاشرے میں مردوں کا اپنی بیویوں کو کھلے دل سے سراہنا ایک مثبت قدم ہے۔