واٹربورڈ نے رمضان کے دوران شہریوں کو دستیاب پانی کی فراہمی اور نکاسی آب کے بہتر انتظامات کیلئے حکمت عملی تیارکرلی

جمعرات مئی 22:42

کراچی ۔ (اُردو پوائنٹ اخبارتازہ ترین۔ 17 مئی2018ء) واٹربورڈ نے رمضان المبارک کے دوران شہریوں کو دستیاب پانی کی فراہمی اور نکاسی آب کے بہتر انتظامات کیلئے حکمت عملی تیارکرلی ہے جبکہ ایم ڈی واٹربورڈ خالد محمود شیخ نے آپریشنل اور فیلڈ اسٹاف کو اپنے علاقوں میں دستیاب پانی کی فراہمی ممکن بنانے اور فراہمی ونکاسی آب کے ممکنہ مسائل سے نمٹنے کے لئے ہائی الرٹ جاری کردیا ہے،ماہ صیام کے دوران شہریوں کی شکایات کے فوری ازالے کے لئے واٹربورڈ کی تنصیبات خصوصاً پمپنگ اسٹیشن کے علاوہ سیورکلینگ جیٹنگ اور راڈنگ مشینیں تیار رکھنے کے احکامات بھی جاری کردیئے گئے ہیں ، ایم ڈی واٹربورڈ خالد محمود شیخ نے ادارے کے افسران و انجینئرز کا ایک اعلیٰ سطح کا اجلاس طلب کیا اجلاس میں ڈپٹی منیجنگ ڈائریکٹر پلاننگ سلیم احمد ، ڈپٹی منیجنگ ڈائریکٹر ٹیکنیکل سروسز اسد اللہ خان سمیت تمام سپرنٹنڈنگ انجینئر ز،ایگزیکٹیو انجینئرز نے شرکت کی ،اجلاس سے خطاب کرتے ہوئے ایم ڈی واٹربورڈ نے کہا کہ ماہ مبارک کے دوران شہریوں کو دستیاب پانی کی منصفانہ تقسیم ممکن بنانے کے لئے اہم اقدامات کئے جارہے ہیں ، واٹربورڈ کے آپریشنل اور فیلڈ اسٹاف کو شہریوں کی فراہمی ونکاسی آب سے متعلق شکایات کے فوری ازالے کے لئے ہائی الرٹ جاری کیا جارہا ہے ، انہوں نے تمام سپرنٹنڈنگ انجینئرز کو ہدایت کی کہ وہ رمضان کے دوران تمام مساجد ،امام بارگاہوں ،تراویح کے مقامات کے اطراف نکاسی آب کے خصوصی و فوری اقدامات کریں، مساجد میں پانی کی فراہمی ہر صورت ممکن بنائی جائے ، ایگزیکٹیوانجینئرز اپنے متعلقہ علاقوںمیں دستیاب پانی کی منصفانہ تقسیم کو یقینی بنائیں ،فیلڈاسٹاف نکاسی آب کی صورتحال پر نظر رکھیں اور کسی بھی قسم کی شکایات کی صورت میں اس کا فوری ازالہ ممکن بنائیں ،انہوں نے واٹربورڈ کمپلین سینٹر کے ذمہ داروں کو ہدایت کی کہ شہریوں کی جانب سے فراہمی ونکاسی آب سے متعلق ملنے والی شکایات کو ایک مربوط اور فول پروف پروگرام کے تحت فوری طور پر متعلقہ سپرنٹنڈنگ انجینئرز اور ایگزیکٹیو انجینئرز کو آگاہ کریں ، نمٹائی جانے والی شکایات سے فوری طور پر ایم ڈی سیکریٹریٹ کوآگاہ کیا جائے انہوں نے کہا کہ تمام سپرنٹنڈنگ انجینئرز متعلقہ شہری انتظامیہ خصوصاً منتخب نمائندوں سے رابطے میں رہیں اور تعاون حاصل کریں ،شکایات کا فوری ازالہ ہر صورت ممکن بنایا جائے ،انہوں نے کہا کہ شہریوں کو فراہمی و نکاسی آب کی بہتر سہولیات کیلئے وہ شہر کے مختلف علاقوں کا دورہ کریں گے اور واٹربورڈ کے پمپنگ اسٹیشنوںسمیت دیگر تنصیبات کا معائنہ کریں گے۔

متعلقہ عنوان :

کراچی شہر میں شائع ہونے والی مزید خبریں:

Your Thoughts and Comments