منی بجٹ، صنعتی اور برآمداتی شعبے کو مزید ریلیف ملنے کی توقع ہے، فراز الرحمان

پیدواری لاگت میں کمی کیلئے پالیسی سازی کرنا ہوگی، قائم مقام صدر کاٹی

ہفتہ 19 جنوری 2019 23:26

کراچی۔ (اُردو پوائنٹ اخبارتازہ ترین - اے پی پی۔ 19 جنوری2019ء) کورنگی ایسوسی ایشن آف ٹریڈ اینڈ انڈسٹری (کاٹی) کے قائم مقام صدر فراز الرحمان اور نائب صدر ماہین سلمان نے توقع ظاہر کی ہے کہ وفاقی حکومت منی بجٹ میں صنعتی اور برآمداتی شعبے کو ریلیف دینے کے لیے مؤٖثر اقدامات کا اعلان کرے گی۔ ہفتہ کو جاری کردہ اعلامیہ میں فراز الرحمان نے کہا کہ توانائی کے مسائل حل کرنے کے ساتھ ساتھ حکومت کو منی بجٹ اور آئندہ مالی سال کے لیے قومی بجٹ کی تیاری میں یہ نکتہ بھی پیش نظر رکھنا چاہیے کہ اس وقت صنعتیں بڑی مقدار میں خام مال بھی درآمد کررہی ہیں۔

انہوں نے کہا کہ صنعتوں کی پیدواری لاگت کم کرنے کے لیے صنعتی خام مال کی کم نرخوں پر دستیابی کو یقینی بنانے کیلئے بھی پالیسی سازی کی جائے۔

(جاری ہے)

انہوں نے کہا کہ صنعتی انفرااسٹرکچر کی بہتری سے بھی کاروباری لاگت کم کرنے میں مدد ملے گی۔ انہوں نے وزیر اعظم عمران خان اور وفاقی وزیر خزانہ اسد عمر کی جانب سے برآمدات اور صنعتی شعبے سے متعلق ترجیحی بنیادوں پر اقدامات کو لائق تحسین قرار دیا۔ قائم مقام صدر فراز الرحمان کا مزید کہنا تھا کہ معاشی استحکام کے لیے بالخصوص کراچی میں قائم صنعتوں کو درپیش انفراسٹرکچر کی بہتری اور بحالی کے لیے خصوصی پیکج کی اشد ضرورت ہے۔ انہوں نے کہا کہ کراچی کے صنعتی علاقوں کی تعمیر و ترقی کے لیے وفاقی و صوبائی حکومت جامع حکمت عملی ترتیب دے۔