پاک بحریہ کی جانب سے مبارک ویلیج میں مفت آئی کیمپ کا انعقاد

پیر 16 ستمبر 2019 21:01

کراچی۔ (اُردو پوائنٹ اخبارتازہ ترین - اے پی پی۔ 16 ستمبر2019ء) پاک بحریہ کے زیر اہتمام آئی سائٹ ٹرسٹ کے تعاون سے مبارک ویلیج میں مفت آئی کیمپ کا انعقاد کیا گیا۔ آئی کیمپ کے انعقاد کا مقصد بنیادی سہولیات سے محروم مبارک ویلیج کی عوام کو امراضِ چشم سے متعلق مفت مشورے اور طبی سہولیات کی فراہمی تھا۔ پیر کو پاک بحریہ سے جاری کردہ اعلامیہ کے مطابق ایک روزہ کیمپ پاک بحریہ کی سرپرستی میں منعقد کیا گیا جس میں امراض چشم، آنکھوں کی حفاظت اور بصری صحت کے لئے متوازن غذاء کی اہمیت کے بارے میں آگہی اور آنکھوں کے امراض میں مبتلا افراد کو مفت طبی سہولیات فراہم کی گئیں۔

کیمپ میں امراض چشم میں مبتلا مریضوں کا بڑی تعداد میں معائنہ کیا گیا اور اُنہیں مُفت ادویات اور چشمے فراہم کئے گئے۔

(جاری ہے)

فری آئی کیمپ میں آنے والے ایسے مریض جو موتیا اور آنکھوں کے دیگر پیچیدہ امراض میں مبتلا تھے انہیں مزید طبی علاج اور مفت جراحی پاک بحریہ کے اسپتالوں میں فراہم کی جائے گی۔ پاک بحریہ کی جانب سے ساحلی علاقوں کے مکینوں کی سہولت کے لئے باقاعدگی سے مفت طبی کیمپس کا انعقاد کیا جاتا ہے۔ ان کیمپس کے انعقاد کا مقصد ساحلی علاقوں کی محروم عوام کو معیاری طبی سہولیات فراہم کرنا ہے، مبارک ویلیج پر مفت آئی کیمپ کا انعقاد بھی پاک بحریہ کی انہی کاوشوں کا تسلسل ہے۔