ًکراچی پریس کلب میں سینئر صحافی ابوالحسنات مرحوم کی خدمات کو خراج عقیدت پیش کرنے کے لیے تعزیتی اجلاس

کراچی(اُردو پوائنٹ اخبارتازہ ترین - آن لائن۔ 19 اکتوبر2019ء) کراچی پریس کلب میں سینئر صحافی ابوالحسنات مرحوم کی خدمات کو خراج عقیدت پیش کرنے کے لیے تعزیتی اجلاس منعقد کیا گیا،جس میں کراچی پریس کلب کے صدر امتیاز خان فاران ،سیکریٹری ارمان صابر،سینئر صحافی اے ایچ خانزادہ،پروفیسر پیر زادہ قاسم ،فہیم الزماں ،بشیر سدوزئی سمیت تمام مکتبہ فکر سے تعلق رکھنے والے افراد نے بڑی تعداد میں شرکت کی اس موقع پر خطاب کرتے ہوئے امتیاز خان فاران ،ماہین ،فہیم الزماں و دیگر کا کہنا تھا کہ سینئر صحافی ابوالحسنات نے ہمیشہ صحافی اقدار کی پاسداری کی اور انھیں شعبہ صحافت میں درسگاہ کا درجہ حاصل تھا ،جبکہ وہ فلاسفی ،لٹریچراور بین الاقوامی تعلقات سمیت کئی شعبوں پر مکمل عبور رکھتے تھے ،فہم الزماں کے مطابق ان سے شناسائی کی ابتدا 25برس قبل ہوئی جو ان کے ڈان کا سٹی ایڈیٹر بننے کے بعد دوستی میں تبدیل ہو گئی ،جس کے بعد ان کے کہنے پر کئی برس تک مختلف موضوعات پر آرٹیکل لکھتا رہا ،ابوالحسنات سے بہت ذاتی تعلق رہا اور آج بھی یقین نہیں آتا کہ اب وہ ہم میں موجود نہیں ہیں ،کراچی پریس کلب کے صدر امتیاز خان فاران کا کہنا تھا کہ رواں برس ابوالحسنات اور ادریس بختیار سمیت کئی نامور شخصیات ہم سے جدا ہو گئیں تاہم ان کی جانب سے ورثے میں ملنے والی تمام روایات کی مکمل پاسداری کی جائے گی اور حق و سچ کے سفر میں آنے والی تمام مشکلات کا ڈٹ کر مقابلہ کیا جائے گا۔