کے الیکٹرک کا میٹر ریڈنگ شروع کرنے کا فیصلہ

جن صارفین نے مارچ کے ایوریج بلز ادا نہیں کیے ہیں وہ اپریل کے میٹر ریڈنگ کے بلز کے ساتھ ادا کر سکتے ہیں،ترجمان کے الیکٹرک بل کی عدم ادائیگی پر کے الیکٹرک کسی بھی صارف کی بجلی نہیں کاٹے گی اور کے الیکٹرک فوری طور ایوریج بل درست کرے گا،وزیرتوانائی امتیاز شیخ

بدھ 8 اپریل 2020 21:16

کراچی(اُردو پوائنٹ اخبارتازہ ترین - این این آئی۔ 08 اپریل2020ء) کے الیکٹرک کی جانب سے میٹر ریڈنگ کا سلسلہ شروع کرنے کا فیصلہ کیا گیا ہے۔ترجمان کے الیکٹرک کے مطابق جن صارفین نے مارچ کے ایوریج بلز ادا نہیں کیے ہیں وہ اپریل کے میٹر ریڈنگ کے بلز کے ساتھ ادا کر سکتے ہیں، ان سے مارچ کے بل کے لیٹ پیمنٹ سرچارج بھی وصول نہیں کیے جائیں گے۔ترجمان کے الیکٹرک کے مطابق 300 یونٹس ماہانہ سے کم کے بلوں کو حکومت کے اعلان کے مطابق اقساط کہ سہولت دی جائے گی جبکہ جن علاقوں میں میٹر ریڈنگ فورا شروع کی جارہی ہے وہاں صارفین سے کے الیکٹرک کی گزارش ہے کہ عملے کے ساتھ مکمل تعاون کریں۔

ترجمان کے الیکٹرک کے مطابق کراچی کے تمام علاقوں میں بجلی کی بلا تعطل فراہمی پہلے سے جاری ہے جبکہ جن علاقوں میں میٹر ریڈنگ سیفٹی کی بنیاد پر ابھی ممکن نہیں وہاں کم ایوریج کی بنیاد پر بلنگ کی جائے گی۔

(جاری ہے)

کے الیکٹرک کی جانب سے صوبائی اور وفاقی حکومت سے درخواست کی گئی ہے کہ بڑھتے ہوئے 240 ارب روپے کے واجبات کی ادائیگی کو فی الفور یقینی بنایا جائے تاکہ کراچی میں بجلی کی بلا تعطل فراہمی میں خلل نہ آئے۔

دوسری جانب سندھ کے وزیر توانائی امتیاز شیخ نے کہا ہے کہ بل کی عدم ادائیگی پر کے الیکٹرک کسی بھی صارف کی بجلی نہیں کاٹے گی اور کے الیکٹرک فوری طور ایوریج بل درست کرے گا۔وزیرتوانائی امتیاز شیخ نے کہاکہ بل میٹر ریڈنگ کے بنیاد پر جاری کئے جائیں گے ۔انہوں نے کہاکہ وزیر اعلی سندھ سید مراد علی شاہ نے نے 4000 روپے تک کے بل میں چھوٹ دی ہے، مارچ اور اپریل کے بل یکمشت وصول نہیں کئے جائیں گے۔امتیاز شیخ کے مطاق وزیر اعلی کی ہدایت پر سختی سے عمل کرایا جائے گا۔