دادو کے بارشوں سے متاثرہ علاقوں میں پاک بحریہ کی جانب سے ریسکیو اور ریلیف آپریشن

منگل 11 اگست 2020 23:32

کراچی۔11 اگست(اُردو پوائنٹ اخبارتازہ ترین - اے پی پی۔ 11 اگست2020ء) پاکستان بحریہ کی ریسکیو اور ایمرجنسی رسپانس ٹیموں نے سول انتظامیہ کے تعاون سے سندھ کے ضلع دادو میں بارش سے متاثرہ علاقوں میں ریلیف آپریشن کیا۔منگل کو جاری اعلامیہ کے مطابق موسلا دھار بارش اور نائی گج ڈیم میں شگاف پڑنے کی وجہ سے علاقے میں متعدد دیہات زیر آب آگئے ہیں۔ پاکستان بحریہ کی امدادی ٹیمیں موٹربوٹس اور جان بچانے کے سامان کے ہمراہ اتوار کی صبح سے ہی شدید بارش اور طوفانی سیلاب سے متاثرہ علاقوں تک پہنچ گئیں۔

(جاری ہے)

ٹیموں نے جوہی گوٹھ کے ملحقہ علاقوں میں پھنسے ہوئے مقامی باشندوں کی بڑی تعداد کو نکال لیا ہے۔ 400 سے زائد خاندانوں کو امدادی سامان اور راشن بھی فراہم کیا گیا ہے۔ اس کے علاوہ بارش سے متاثرہ افراد کے لئے ضروری طبی سہولیات کے ساتھ ایک میڈیکل کیمپ بھی قائم کیا گیا ہے۔ دور دراز علاقوں میں طغیانی سے بچائو کی کوششوں کو بڑھانے اور امدادی سرگرمیوں کو مزیدبہتر کرنے کے لئے جوہی گوٹھ میں ایک ہوورکرافٹ بھی تعینات کیا گیا ہے۔ پاکستان بحریہ بین الاقوامی اورمقامی سطح پر تباہی اور قدرتی آفات کی صورت میں امدادی اور ریلیف آپریشنز کے انعقاد میں ہمیشہ پیش پیش رہتی ہے۔

کراچی میں شائع ہونے والی مزید خبریں