کراچی،مختلف کارروائیوں کے دوران لیاری گینگ وار کارندے،زخمی ملزمان،ڈکیت،اسٹریٹ کرمنلزاورمنشیات فروشوں سمیت 24 ملزمان گرفتار ،

اسلحہ،منشیات اور مسروقہ سامان برآمد

منگل 22 ستمبر 2020 00:05

کراچی (اُردو پوائنٹ اخبارتازہ ترین - آن لائن۔ 21 ستمبر2020ء) پولیس نے شہر کے مختلف علاقوں میں مقابلے ودیگر کارروائیوں کے دوران لیاری گینگ وار کارندے۔زخمی ملزمان۔ڈکیت۔اسٹریٹ کرمنلز۔منشیات فروشوں سمیت 24 ملزمان کو گرفتار کرکے اسلحہ۔منشیات اور مسروقہ سامان برآمد کرلیا۔تفصیلات کے مطابق شارع فیصل پولیس نے کارروائی کے دوران گینگ وار کارندے فراز علی عرف ڈبر کو گرفتار کرکے قبضے سے اسلحہ برآمد کرلیا۔

پولیس کے مطابق گرفتار ملزم کا تعلق چنیسر گوٹھ گینگ وار گروپ سے ہے ملزم پہلے بھی جیل جاچکا ہے۔پولیس کے مطابق گرفتار ملزم کسی بڑی واردات کی نیت سے غیرقانونی اسلحہ بیگ میں رکھ کر ملیر شفٹ کررہا تھا۔تاہم ملزم سے مزید تفتیش جاری ہے۔ سہراب گوٹھ پولیس نے مقابلے کے بعد دو ملزمان اسماعیل اور فیروز کو زخمی حالت میں گرفتار کرکے اسلحہ برآمد کرلیا۔

(جاری ہے)

فیروز آباد پولیس نے اسٹریٹ کرائم کی وارداتوں میں ملوث تین رکنی گروہ کارندوں عقیل۔یاسر اور کامران کو گرفتار کرکے قبضے سے اسلحہ اور دو موٹر سائیکلیں برآمد کرلیں۔پولیس کے مطابق گرفتار ملزمان لوٹ مار کی درجنوں وارداتوں میں ملوث ہیں۔ سعید آباد پولیس نے دو ملزمان عمر اور الیاس کو گرفتار کرکے اسلحی برآمد کرلیا۔ سائٹ سپر ہائی وے پولیس نے اسٹریٹ کرائم میں ملوث دو ملزمان محمد علی اور محمد عرفان کو گرفتار کرکے اسلحہ اور مسروقہ سامان برآمد کرلیا۔

جیکسن پولیس نے منشیات فروش محمد رمضان کو گرفتار کرکے منشیات برآمد کرلی۔کلاکوٹ پولیس نے ملزم عبدالوہاب کو گرفتار کرکے منشیات برآمد کرلی۔جبکہ ایک اور کارروائی کے دوران دو گینگ وار کارندوں کبیر احمد حصام کو گرفتار کرکے اسلحہ برآمد کرلیا۔ شرافی گوٹھ پولیس نے نجی کمپنی کے لاکرز توڑ کر رقم لے کر فرار ہونے والے ملزمان میں سے ایک ملزم حاجن کو گرفتار کرلیا جبکہ ملزم کے ساتھی مراد کی تلاش جاری ہے۔

ایک اور کارروائی میں پولیس نے گٹکا فروش حنیف کو گرفتار کرکے مضر صحت گٹکا برآمد کرلیا۔ نیپئر پولیس نے چار ملزمان شایان۔سعیدالرحمن۔محمد سلمان اور محمد سلیمان کو گرفتار کرکے اسلحہ۔منشیات اور چوری شدہ موٹر سائیکل برآمد کرلی۔پولیس کے مطابق گرفتار ملزمان ڈکیتی۔موٹر سائیکل لفٹنگ اور منشیات فروشی میں ملوث ہیں۔ سائٹ اے پولیس نے پرائز بانڈز چھین کر فرار ہونے والے ملزمان میں سے ایک ملزم علی شیر کو زخمی حالت میں گرفتار کرکے مسروقہ بانڈز برآمد کرلئے۔ ایک اور کارروائی میں منشیات فروشوں ظاہر شاہ اور اجمل خان اور محمد رحیم کو گرفتار کرکے منشیات برآمد کرکے ایک رکشہ تحویل میں لے لیا۔#