لڑکی کو زیادتی کے بعد قتل کرکے خودکشی کا رنگ دینے والا درندہ گرفتار

کمپنی ٹھیکے دار نے لڑکی کے والد کو اپنے گھر بلاکر ملازم بیٹی کی لاش دی اور کہا کہ لڑکی نے خودکشی کرلی

جمعرات 21 جنوری 2021 23:48

کراچی(اُردو پوائنٹ اخبارتازہ ترین - این این آئی۔ 21 جنوری2021ء) شرافی گوٹھ پولیس نے نوجوان لڑکی کے قتل میں ملوث ملزم کو گرفتار کرلیا، ملزم نے زیادتی و قتل کے بعد واقعے کو خودکشی کا رنگ دیا تھا، ملزم کے دیگر ساتھیوں کی تلاش میں چھاپے جاری ہیں۔پولیس کے مطابق بدھ کو شرافی گوٹھ کے علاقے میں گھر کے اندر سے نوجوان لڑکی کی لاش ملی۔ لڑکی کے والد محمد عالم نے واقعے کا مقدمہ الزام نمبر 25/2021 درج کرایا۔

لڑکی کے والد نے بتایا کہ ان کی بیٹی مقامی فیکٹری میں ملازمت کرتی تھی، اس فیکٹری کے ٹھیکے دار راشد نے بدھ کو اسے ورغلایا اور اپنے گھر لے گیا، اس کے ساتھ زبردستی زیادتی کی کوشش کی اور بیٹی کو گلا گھونٹ کر ہلاک کردیا، بیٹی کے چہرے اور بازوں پر بھی نشانات ہیں۔والد نے بتایا کہ ملزم نے بدھ کی شام خود فون کرکے مجھے بلایا اور بتایا کہ آپ بیٹی کی طبیعت خراب ہوگئی تھی جس کی وجہ سے اسے اپنے گھر لے آیا ہے، جب میں راشد کے گھر پہنچا تو بیٹی کی لاش پڑی تھی۔

(جاری ہے)

محمد عالم نے بتایا کہ لاش ملنے کے بعد راشد خان دبائو ڈالتا رہا کہ لاش اسپتال نہیں اپنے گھر لے جائو۔پولیس حکام کے مطابق پولیس نے واقعے کا مقدمہ قتل کی دفعہ کے تحت درج کرکے ملزم راشد خان کو گرفتار کرلیاہے۔ واقعے میں راشد کے ساتھ دیگر ملزمان کے ملوث ہونے کا بھی شبہ ہے جنھیں جلد گرفتار کرلیا جائے گا، ملزم کے خلاف مزید تحقیقات کا آغاز کردیا گیا ہے۔