پاسبان نے نیشنل اسٹیڈیم کے اطراف کی سڑکوں کی بندش کے خلاف سندھ ہائی کورٹ میں آئینی درخواست دائر کر دی

بدھ 27 جنوری 2021 17:31

کراچی (اُردو پوائنٹ اخبارتازہ ترین - این این آئی۔ 27 جنوری2021ء) پاسبان ڈیموکریٹک پارٹی نے کراچی نیشنل اسٹیڈیم کے اطراف کی سڑکوں اور گلیوں کی بندش کے خلاف سندھ ہائی کورٹ میں آئینی درخواست دائر کر دی۔

(جاری ہے)

پاسبان ڈیموکریٹک پارٹی کی میڈیا کو آرڈینیٹر عزیز فاطمہ کی جانب سے وکیل عرفان عزیز ایڈووکیٹ نے سندھ ہائی کورٹ میں دائر کی گئی آئینی درخواست میں کہاہے کہ 26 جنوری سے 31جنوری 2021تک نیشنل اسٹیڈیم کراچی میں ہونے والے بین الاقوامی میچوں کی وجہ سے اطراف کی تمام سڑکوں اور گلیوںکو بند کر کے ، گذرنے والے ٹریفک کو روک دیا گیا ہے جو کہ شہریوں کے بنیادی حقوق کی سنگین خلاف ورزی ہے ۔

اس بندش کی وجہ سے کراچی کی پوری ٹریفک ،شہری، طلبہ اور مریض بری طرح متاثرہورہے ہیں۔ نیشنل اسٹیڈیم میں ہونے والے بین الاقوامی میچوں کی خاطر مصروف سڑکوں کو روکنا انتظامیہ کی مکمل ناکامی کو ظاہر کرتا ہے۔ آئینی درخواست میں عدالت سے استدعا کی گئی ہے کہ سر شاہ سلیمان روڈ، یونیورسٹی روڈ، ڈالمیا روڈ، آغا خان روڈ، کارساز روڈ، اور نیشنل اسٹیڈیم کے آس پاس سے رکاوٹوں اور کنٹینرز کو فوری طور پر ہٹایا جائے اور عوام کی پریشانی کا ازالہ کیا جائے۔ کیس کی سماعت ،سندھ ہائی کورٹ میں کل بروز جمعرات 28 جنوری 2021 کوہو گی۔