سندھ کلچر ڈے ملاکھڑا چیمپیئن شپ‘ خان محمد شورو نے میدان مار لیا

کراچی (اُردو پوائنٹ اخبارتازہ ترین - این این آئی۔ 05 دسمبر2021ء) سندھ اسپورٹس بورڈ اور ملھ ایسو سی ایشن کے اشتراک سے سندھی اجرک ٹوپی کلچرل ڈے کے موقع پر ملاکھڑا چیمپیئن شپ کا انعقاد کیا گیا جس میں کراچی کے تمام اضلاع سی30سے زائد پہلوانوں نے شرکت کی۔ انور خان گوٹھ ڈسٹرکٹ ایسٹ میں ہونے والے اس عظیم الشان ایونٹ میں ہزاروں کی تعداد میں شائقین موجود تھے۔

چیمپیئن شپ کے آخری روز پہلی تین پوزیشن کے مقابلے ہوئے جس میں پہلوان خان محمد شورو نے اپنے مد مقابل رجب باریجو کو شکست دے کر پہلی پوزیشن ہاصل کی پہلوان امیر شیدی نے گلاب بلوچ جبکہ نثار خاصخیلی نے شیر بلوچ کو زیر کرکے بالتریب دوسری اور تیسری پوزیشن حاصل کی۔ٹورنامنٹ میں عمدہ کارکردگی پر عبدالجبار گلدستہ کو بہترین کھلاڑی قرار دیا گیا۔

(جاری ہے)

مہمان خصوصی سیکریٹری اسپورٹس اینڈ یوتھ افیئرز اختر عنایت بھرگڑی آفس کی مصروفیات کے سبب نہ آسکے لیکن انہوں نے اپنے پیغام میں آرگنائزر بہرام خاصخیلی کو مبارکباد دیتے ہوئے کہا کہ سندھ بھر میں ملاکھڑا کے فروغ کے لئے آپ کی کوششیں قابل قدر ہیں محکمہ کھیل اس روائتی کھیل کے فروغ کے لئے ہر سطح پر اپنا تعاون جاری رکھے گا بعد ازاں ملک امام بخش نے صدر نور خان گوٹھ علی گل رند‘ نور اللہ مگسی‘ ممتاز جاکرانی‘ نور بروہی اور عزیز مری کے ہمراہ فاتح کھلاڑیوں میں نقد انعامات تقسیم کئے۔