بلدیاتی ایکٹ میں ترمیم کرکے پیپلز پارٹی کرپشن کی نئی داغ بیل ڈال رہی ہے،وسیم اختر

کراچی (اُردو پوائنٹ اخبارتازہ ترین - این این آئی۔ 08 دسمبر2021ء) متحدہ قومی موومنٹ پاکستان کے تحت 11دسمبر کو ہونے والی آل پارٹی کانفرنس کی تیاریاںجاری ہیں اس سلسلے میں اراکین رابطہ کمیٹی نے دیگر سیاسی جماعتوں سے رابطوں کا سلسلہ تیز کردیا ڈپٹی کنوینر وسابق میئر کراچی وسیم اختر نے اراکین رابطہ کمیٹی کے ہمراہ پاکستان مسلم لیگ (ق) سندھ کے صدر طارق حسن سے انکی رہائش گاہ پر ملاقات کی اور آل پارٹی کانفرنس کا دعوت نامہ پیش کیا۔

اس موقع پر میڈیا نمائندگا ن سے گفتگو کرتے ہوئے وسیم اختر نے کہا کہ پیپلز پارٹی نے سندھ کو تباہ وبرباد کردیا ہے اب پیپلز پارٹی کی متعصب حکومت نے بلدیاتی ایکٹ میں ترمیم کرکے سندھ کے شہری علاقوں کو موہنجوداڑوں میں تبدیل کرنے کا تہیہ کرلیا ہے ،بلدیاتی ایکٹ میں ترمیم کرکے پیپلز پارٹی کرپشن کی نئی داغ بیل ڈال رہی ہے اسی سلسلے میں ایم کیو ایم پاکستان11دسمبر کو ایک آل پارٹی کانفرنس کرنے جارہی ہے جس میںہم نے تمام سیاسی جماعتوں ،مذہبی جماعتوں اور سندھ کے شہری علاقوں کا درد رکھنے والی تمام تنظیموں کو مدحوکیاہے آج ہمارا یہاں آنے کا مقصد بھی آل پارٹی کانفرنس میں شرکت کا دعوت نامہ پیش کرنا ہے۔

(جاری ہے)

طارق حسن نے میڈیا سے گفتگومیں کہا کہ ایم کیو ایم کے دوستوں کا شکر گزار ہوں جنہوں نے ہمیں آل پارٹی کانفرنس کا دعوت نامہ پیش کیا پارٹی کی قیادت سے مشاورت کرکے ایم کیو ایم کی آل پارٹی کانفرنس میں شرکت کا فیصلہ کریںگے۔اس موقع پر ایم کیوایم پاکستان کی رابطہ کمیٹی کے رکن محمد حسین اور شکیل احمد بھی موجود تھے۔