تیل کی قیمتوں میں اضافے کے پیش نظر پبلک ٹرانسپورٹ کے کرایوں میں فوری اضافہ کیا جائے، ٹرانسپورٹرز کی صوبائی وزیر شرجیل میمن سے اپیل

کراچی (اُردو پوائنٹ اخبارتازہ ترین - آن لائن۔ 28 مئی2022ء) صوبائی وزیر اطلاعات و ٹرانسپورٹ شرجیل انعام میمن نے پبلک ٹرانسپورٹ کی نمائندہ تنظیموں سے اجلاس منعقد کیا ٹرانسپورٹرز نے صوبائی وزیر سے اپیل کی کہ تیل کی قیمتوں میں اضافے کے پیش نظر پبلک ٹرانسپورٹ کے کرایوں میں فوری اضافہ کیا جائے۔ پیٹرولیم مصنوعات میں بڑے اضافے کے بعد روٹس پر گاڑیاں نقصان میں چل رہی ہیں۔

صوبائی وزیر شرجیل انعام میمن نے ٹرانسپورٹرز کو تمام مسائل کے حل کی یقین دہانی کرائی۔انہوں نے کہا کہ ہم جانتے ہیں کہ پیٹرول اور ڈیزل کی قیمتیں بڑھ گئی ہیں ، لیکن حکومت عوام پر بوجھ نہیں ڈالنا چاہتی۔کرایوں میں اضافہ کا معاملہ سندھ کابینہ کے آئندہ اجلاس میں اٹھائیں گے۔ جب تک فیصلہ نہ ہو ، ٹرانسپورٹرز کرایوں میں اضافہ نہ کریں۔

(جاری ہے)

اجلاس میں پبلک ٹرانسپورٹ کے کرایوں میں اضافے سمیت روٹس کے اجازت ناموں، گاڑیوں کی فٹنس اور کراچی شہر کو جدید ٹرانسپورٹ کی سہولت فراہم کرنے پر تبادلہ خیال کیا گیا۔

اجلاس میں انٹر سٹی ، انٹرا سٹی اور انٹرا پراونس سمیت دیگر ایسوسی ایشن نے صوبائی وزیر کو اپنے مسائل سے آگاہ کیا۔صوبائی وزیر ٹرانسپورٹ نے کہا کہ ایسی گاڑیاں جو سڑکوں پر لانے کے قابل نہیں ان کے خلاف سختی کریں گے۔ 1 اگست تک ٹرانسپورٹرز اپنی گاڑیاں درست کرالیں ، ٹائم لائن کے بعد گاڑیوں کو سڑکوں پر آنے کی اجازت نہیں ہوگی، دونھیں والی گاڑیوں سے ماحولیاتی آلودگی میں اضافہ ہو رہا ہے۔

انہوں نے سیکریٹری ٹرانسپورٹ کو ہدایت دی کہ روٹس پرمٹس جاری ہونے کے بعد گاڑیاں نہ چلانے والوں کے اجازت نامے ایک ہفتے میں منسوخ کئے جائیں اور روٹ پرمٹس کی تجدید تین سال کے بجائے ایک سال میں کرانے کی پالیسی بنائی جائے۔ انہوں نے کہا کہ محکمہ ٹرانسپورٹ سندھ کا ٹارگٹ ہے کہ کراچی شہر میں ایک دو سال میں بڑی تعداد میں جدید ایئر کنڈیشنڈ بسیں لائے۔ کراچی ٹرانسپورٹ اتحاد کے ارشاد بخاری ،حاجی تواب ، سندھ انٹرا سٹی بس سروس کے شبر منیب ، ربنواز مظفر ، سندھ بس اونر ایسوسی ایشن افضل شیخ سمیت چنگچی رکشہ ایسو سی ایشن و دیگر نمائندہ تنظیمیں شریک۔ سیکریٹری ٹرانسپورٹ عبدالحلیم شیخ، ایڈیشنل سیکرٹری مشتاق احمد شیخ و دیگر بھی موجود تھے۔