سندھ کے 20 اضلاع پولیو سے متاثرہ ہیں،حکومت پولیو کے خاتمے کیلئے پرعزم ہے، وزیراعلیٰ مراد علی شاہ

کراچی (اُردو پوائنٹ اخبارتازہ ترین - اے پی پی۔ 12 نومبر2024ء) وزیراعلیٰ سندھ مراد علی شاہ نے کہا ہے کہ اس وقت سندھ کے 20 اضلاع 13 تصدیق شدہ کیسز کے ساتھ پولیو سے متاثرہ ہیں تاہم حکومت سندھ صوبے سے پولیو وائرس کے خاتمے کےلیے پُرعزم ہے۔جاری اعلامیہ کے مطابق ان خیالات کا اظہار انہوں نے یونیسیف کے نمائندے عبداللہ فاضل اور اقوام متحدہ کے ریزیڈنٹ کوآرڈینیٹر محمد یحٰی کے ساتھ فالو اپ میٹنگ کے دوران گفتگو کرتے ہوئے کیا۔

وزیر تعلیم سردار شاہ ، سیکرٹری وزیراعلیٰ رحیم شیخ اور دیگر ملاقات میں شریک تھے۔وزیراعلیٰ سندھ نے کہا کہ حکومت سندھ نے پولیو خاتمے پر اپنی توجہ مرکوز کر رکھی ہے ،خصوصی طور پر حساس علاقے جیسے کراچی اور دیہی اضلاع شکارپور، سجاول اور گھوٹکی شامل ہے۔

(جاری ہے)

انہوں نے بتایا کہ حالیہ کیس 15 اکتوبر کو گھوٹکی سے رپورٹ ہوا تھا جبکہ تازہ ترین اعداد وشمار سے پتہ چلتا ہے کہ سندھ میں ٹیسٹ کیے گئے 66 فیصد ماحولیاتی نمونوں میں پولیو وائرس پایا گیا ہے۔

سندھ کے ایمرجنسی آپریشن سنٹرز اور لوکل ہیلتھ ٹیمیں اپنے وسائل بروئے کار لا رہی ہیں اور ٹارگٹڈ اقدامات کے ذریعے پانچ سال سے کم عمر بچوں کو پولیو وائرس سے بچانے کےلیے کوششیں کر رہی ہیں۔عبداللہ فاضل نے ویکسینیشن سے انکار کو چیلنج قرار دیتے ہوئے کہا کہ سندھ کا سماجی رویوں میں تبدیلی کی حکمت عملی پر مشتمل (ایس بی سی سی ) پروگرام آگاہی دینے اور قطرے پلانے کےلیے رضامندی میں معاون ثابت ہوگا ،جس پر وزیراعلیٰ سندھ نے بتایا کہ انہوں نے ان علاقوں میں پارلمنٹیرینز کو ویکسینیشن کی سپورٹ پر لگایا ہے جہاں انکار کی شرح زیادہ ہے۔

وزیراعلیٰ نے کہا کہ حکومت کی کوششوں کو عالمی شراکت داروں کی حمایت حاصل ہے جو پاکستان کو پولیو سے پاک قوم کے طور پر دیکھنا چاہتے ہیں،سندھ کی قیادت پولیو کے خاتمے کےلیے ٹارگٹڈ اور پائیدار اقدامات کرکے مثال قائم کر رہی ہے تاکہ پاکستان کے بچوں کا صحت مند اور پولیو فری مستقبل یقینی بنایا جاسکے۔