26اپریل کی شٹر ڈائون ہڑتال ، منعم ظفر خان کی ملاقاتیں ،تاجرو ں کی جانب سے حمایت کا سلسلہ جاری

کراچی(اُردو پوائنٹ اخبارتازہ ترین - این این آئی۔ 21 اپریل2025ء) امیر جماعت اسلامی پاکستان حافظ نعیم الرحمن کی اپیل پر اہل غزہ و فلسطین سے اظہار یکجہتی ، امریکی سرپرستی میں اسرائیلی جارحیت و دہشت گردی کی مذمت اور حکمرانوں کو جھنجوڑنے کے لیے ہفتہ 26اپریل کو ملک گیر شٹر ڈائون ہڑتال کے سلسلے میں کراچی میں بھی جماعت اسلامی کے تاجر تنظیموں کے عہدیداران سے رابطے وملاقاتیں اور تاجروں کی جانب سے ہڑتال کی مکمل حمایت کا سلسلہ جاری ہے ، تفصیلات کے مطابق امیر جماعت اسلامی کراچی منعم ظفر خان نے پیر کے روز امیر ضلع وسطی سید وجیہ حسن کے ہمراہ حیدری مارکیٹ میں ضلع وسطی کی تمام چھوٹی بڑی مارکیٹوں کی تنظیموں و ایسوسی ایشنز کے عہدیداروں سے ملاقات ، بعد ازاں ان کے ہمراہ میڈیا کے نمائندوں سے گفتگو کرتے ہوئے اعلان کیا کہ 26اپریل کو ضلع وسطی میں تمام دوکانیں مکمل طور پر بند رہیں گی اور اہل غزہ و فلسطین سے بھر پور اظہار یکجہتی کیا جائے گا ۔

(جاری ہے)

منعم ظفر خان نے ہڑتال کی مکمل حمایت پر تاجر رہنمائوں سے اظہار تشکر کیا او ر کہا کہ جماعت اسلامی اسرائیلی جارحیت و دہشت گردی کے شکار اہل غزہ و فلسطین کے لیے ڈیڑھ سال سے مسلسل جدوجہد کررہی ہے ،امیرجماعت اسلامی پاکستان حافظ نعیم الرحمن کی اپیل پر 26اپریل کو ملک گیر شٹر ڈاؤن ہڑتال کی جائے گی اور پورا ملک ایک ساتھ اہل غزہ سے اظہار یکجہتی ،امریکہ واسرائیل سے اظہار نفرت و مذمت اور حکمرانوں کو جھنجھوڑے گا، صیہونی مصنوعات کا بائیکاٹ بھی جاری اور اس مہم کو مزید تیز اور منظم کیا جائے گا ،حمایت و یقین دہانی کرانے والوں اور میڈیا کے نمائندوں سے گفتگو کے موقع پر آل حیدری مارکیٹ ٹریڈرز ایسوسی ایشن کے صدر محمد ساجد ، حیدری مینجمنٹ کمیٹی کے صدر سید اختر شاہد ، محمد ندیم ، لیاقت آباد و حیدری صرافہ ایسوسی ایشن کے صدرفراز حمد ، ٹو لز اینڈ جیمز ایسوسی ایشن کے ذاکرراجا،زرگراں ایسوسی ایشن کے مبشر احمد،ناظم آباد گول مارکیٹ ایسوسی ایشن کے عارف پہلوان و ارشد ہاشمی ، گلبہار ٹریڈرز ایسوسی ایشن کے ارشد ملک ، اردو بازار مارکیٹ ایسوسی ایشن کے فرقان،عرفان ، خلافت چوک جنرل مرچنٹ کے طارق ، ہارون شاپنگ سینٹر بفرزون کے متین ، میٹریس مارکیٹ ایسوسی ایشن کے احمد ، سرینہ موبائل مال ایسوسی ایشن کے صدرحاتمی قریشی و دیگر تاجر رہنما موجود تھے ۔

بعد ازاں منعم ظفر خان اور تاجر رہنمائوں نے میڈیا کے نمائندوں سے گفتگو کرتے ہوئے،علاوہ ازیں منعم ظفر خان کی زیر صدارت منگل 22اپریل کو ادارہ نور حق میں 4بجے دن تاجروں کا نمائندہ اجلاس ہو گا ، جس میں تاجر رہنما مکمل اتحا د و یکجہتی کا اظہار کرتے ہوئے شٹر ڈائون کی حمایت کریں گے ۔ دریں اثناء امیر جماعت اسلامی کراچی منعم ظفر خان کی ہدایت پر کراچی کی مضافاتی مارکیٹوں میں جماعت اسلامی کے ڈپٹی جنرل سیکرٹری و سابق ممبر صوبائی اسمبلی یونس بارائی اور اسمال ٹریڈرز کراچی کے صدر محمود حامد نے رابطے کیے ،اس سلسلے میں لانڈھی بابر مارکیٹ کے جنرل سیکرٹری محمد عزیر اور نائب صدر وقار صدیقی ،انجمن تاجران قائد آباد کہ رہنما فہد درانی ،فلک ناز ٹاور ایئرپورٹ کے صدر مختار قریشی ،لیاقت مارکیٹ ملیر کے صدر محمد حنیف گھانچی ،بابر مارکیٹ کے رہنما شفیق پاپا، لسبیلہ چنگ چی مارکیٹ ایسوسی ایشن کے ملک شفیق و شیر باز خان سے علیحدہ علیحدہ ملاقاتیں کیں اور انہیں 22 اپریل کے تاجر رہنماؤں کے اجلاس میں شرکت کی دعوت دی ۔

تاجر تنظیموں ، مارکیٹ ایسوسی ایشنز کے عہدیداران نے وفد سے بات چیت کرتے ہوئے کہا کہ قائد آباد کے تاجر مظلوم فلسطینیوں کے ساتھ ہے ،26 اپریل کو مکمل شٹر ڈاؤن ہڑتال کریں گے اور ہماری پوری نیک تمنائیں غزہ کے مسلمانوں کے ساتھ ہیں ۔انہوں نے وفد کو یقین دلایا کہ وہ جماعت اسلامی کی اس جدوجہد میں ان کے ساتھ ہے اور ہم کسی صورت بھی فلسطینیوں کو تنہا نہیں چھوڑیں گے۔

تاجر رہنماؤں نے 26 اپریل کی ہڑتال کی حمایت کا اعلان کیا ہے اور کہا ہے کہ 26 اپریل کو کراچی کی مضافاتی مارکیٹوں کے تاجر بھی پورے پاکستان کی طرح مکمل شٹر ڈاؤن رکھیں گے اور فلسطینیوں سے اظہار یکجہتی کریں گے انہوں نے مطالبہ کیا کہ اب پانی سر سے اونچا ہو چکا ہے لہٰذا فوری طور پر حکومت پاکستان اور عالم اسلام کے حکمرانوں کو اس خونریزی کو روکنے کے لیے اپنا کردار ادا کرنا ہوگا۔علاوہ ازیں فروٹ مارکیٹ ایسوسی ایشن کے رہنما قدیم آغاو سبزی منڈی مارکیٹ کے نمائندہ تاجروں اور عہدیداران نے بھی 26اپریل کی شٹر ڈائون ہڑتال کی مکمل حمایت کا اعلان کیا اور کہا ہے کہ دیگر مارکیٹوں کی طرح فروٹ و سبزی منڈی میں بھی کاروبار بند رہے گا ۔