نیشنل اسٹیڈیم کا ترقیاتی کام دسمبر میں مکمل ہوگا

نئے سرے سے تعمیرہونگی،چھتوں کا میٹریل جرمنی سے آئے گا‘آئندہ پی ایس ایل سے قبل ہی پورا نیشنل اسٹیڈیم نئے روپ میں نظر آئے گا‘نیسپاک انجینئر

اتوار 22 جولائی 2018 19:20

کراچی(اُردو پوائنٹ اخبارتازہ ترین - آن لائن۔ 22 جولائی2018ء) نیشنل اسٹیڈیم کراچی میں ترقیاتی کام دسمبر میں مکمل ہوجائے گا جب کہ آئندہ پی ایس ایل سے قبل تاریخی وینیو ایک نئے روپ میں نظر آئے گا۔کراچی میں نیشنل اسٹیڈیم میں تعمیراتی کام کا پہلا مرحلہ پی ایس ایل تھری فائنل اور ویسٹ انڈیز کیخلاف سیریز سے قبل مکمل کیا گیا،دوسرے مرحلے کا کام روک کر ان ایونٹس کا انعقاد کرایا گیا،تماشائیوں نے چھت کے بغیر اسٹینڈز کے باوجود ان مقابلوں سے بھرپور لطف اٹھایا، ایک طویل تاریخ رکھنے والے وینیو میں اب دوبارہ بڑی تیزی سے تعمیراتی امور مکمل کرنے کی کوشش ہو رہی ہے۔

نیسپاک کے انجینئر اسلم بھٹو نے بتایا کہ پویلین بلڈنگ میں چیئرمین باکسز اورتیسرے فلور کی چھتیں گرا دی گئی ہیں جنھیں نئے سرے سے تعمیرکیا جائے گا،جرمنی کی ایک کمپنی اگست کے وسط میں چھتوں کا میٹریل کراچی بھیج دے گی تو اس کی تنصیب شروع کردیں گے۔

(جاری ہے)

انھوں نے بتایا کہ چیئرمین باکس اے اور بی کو اکٹھا کردیا گیا ہے، ڈریسنگ روم پہلے ہی مکمل کرلیا گیا تھا، اسٹینڈز میں نئی کرسیاں بھی لگائی جائیں گی،دوسرے مرحلے کاتمام کام دسمبر میں مکمل کرلیا جائے گا،آئندہ پی ایس ایل سے قبل ہی پورا نیشنل اسٹیڈیم نئے روپ میں نظر آئے گا،نہ صرف عمارت اور اسٹینڈز بلکہ وینیو میں موجود تمام سہولیات عالمی معیار کے مطابق ہونگی۔

یاد رہے کہ 9سال کے طویل عرصے بعد پی ایس ایل فائنل کی بدولت کراچی میں انٹرنیشنل کرکٹرز کی آمد ہوئی تھی،اس میلے کا کامیاب انعقاد ہونے کے بعد ویسٹ انڈیز کو بھی قائل کرنے میں آسانی ہوئی،کیریبیئنز نے یہاں 3ٹی ٹوئنٹی میچز کی سیریز کھیلی تھی۔