کرکٹ آسٹریلیا کے چیف ایگزیکٹو اور سکیورٹی مینیجر (کل)پاکستان پہنچیں گے

اتوار 15 ستمبر 2019 22:40

لاہور(اُردو پوائنٹ اخبارتازہ ترین - این این آئی۔ 15 ستمبر2019ء) کرکٹ آسٹریلیا کے چیف ایگزیکٹو اور سکیورٹی مینیجر کل( منگل) کو پاکستان پہنچیں گے۔پاکستان کرکٹ بورڈ کے ذرائع کے مطابق کرکٹ آسٹریلیا کے چیف ایگزیکٹو کیون رابرٹس اور سکیورٹی مینیجر شان کیرل ایک روزہ دورے پر پاکستان پہنچیں گے اور پی سی بی حکام سے ملاقاتیں کریں گے۔

(جاری ہے)

ذرائع کے مطابق چیئرمین پاکستان کرکٹ بورڈ اور چیف ایگزیکٹو پی سی بی وسیم خان آسٹریلین کرکٹ حکام سے ملاقات کر کے آسٹریلوی بورڈ کے عہدیداران کو سکیورٹی سے متعلق صورتحال پر بریفنگ دیں گے۔

کیون رابرٹس اور شان کیرل کی حکومتی عہدیداروں سے بھی ملاقات کروائی جائے گی تاکہ اعتماد سازی کو مزید مضبوط بنایا جائے۔ پی سی بی کے مطابق پاکستان اور آسٹریلیا کے درمیان 2022 میں سیریز شیڈول ہے۔یاد رہے کہ پاکستان کرکٹ بورڈ کی جانب سے دوسرے ممالک کے بورڈز کی اعتمادی سازی مہم کے سلسلے میں انٹرنیشنل کرکٹ بورڈز کو مدعو کرچکا ہے۔آئندہ ماہ انگلینڈ کرکٹ بورڈ کا اعلی سطح کا وفد بھی پاکستان آئے گا۔