ملک بھر میں آپریشن ردالفساد،3اشتہاریوں سمیت 30سے زائد زیر حراست

اتوار 26 مارچ 2017 12:10

کشمور(اُردو پوائنٹ اخبارتازہ ترین - آن لائن۔ 26 مارچ2017ء)ملک کے مختلف شہروں میں سرچ آپریشن کے دوران 3اشتہاریوں سمیت 30سے زائد افراد کو گرفتارکرلیا گیا۔کشمور میں مختلف جرائم میں ملوث ایک اشتہاری ملزم بھی مارا گیا۔کشمور میں غوث پور کے کچے کے علاقے میں پولیس، رینجرز اور حساس اداروں نے کارروائی کی جس میں مختلف جرائم میں ملوث اشتہاری ملزم گل بھیو مارا گیا، جس سے اسلحہ بھی برآمد ہوا۔

(جاری ہے)

ایس ایس پی ڈاکٹر سمیع اللہ سومرو کے مطابق ملزم 100 سے زائد قتل، اغوا برائے تاوان اور سنگین مقدمات میں پولیس کو مطلوب تھا۔حافظ آباد میں پولیس نے چھاپا مار کردو ڈرم شراب برآمد کرلی اورملزم کوگرفتار کر لیا۔بھکر میں منکیرہ اور صدر کے علاقوں میں پولیس نے سرچ آپریشن کیا آپریشن کے دوران 3 اشتہاری ملزمان سمیت 17 افراد کو حراست میں لے لیا گیا، جن سے اسلحہ بھی برآمد ہوا۔ادھر لودھراں میں کو ٹلی موڑ میں پولیس نے کارروائی کی جس میں 15مشتبہ افراد کو حراست میں لیا گیا جن کی بائیو میڑک تصدیق بھی کی گئی۔