قصور، مویشی منڈیوں اور سیل پوائنٹس پر جانوروں کو مفت طبی امداد دینے کیلئے عملہ تعینات

قصور۔17 اگست(اُردو پوائنٹ اخبارتازہ ترین - اے پی پی۔ 17 اگست2018ء) محکمہ لائیو سٹاک قصور نے مویشی منڈیوں اور سیل پوائنٹس پر جانوروں کو مفت طبی امداد اور کانگو وائر س سے بچائو کیلئے عملہ تعینات کر دیا ،تفصیلات کے مطابق حکومت پنجاب کی واضح ہدایات کی روشنی میںمحکمہ لائیو سٹاک قصور نے مویشی منڈیوں میں جانوروں کو کانگو وائر س اور دیگر بیماریوں سے بچائو کیلئے اقدامات کرلئے ہیں اور اس سلسلے میں مویشی منڈیوں اور شہر کے داخلی و خارجی راستوں پر خصوصی کیمپ لگائے ہیں جہاں محکمہ لائیو سٹاک کا عملہ 24گھنٹے کام کر رہا ہے، ایڈیشنل ڈائریکٹر محکمہ لائیو سٹاک قصور ڈاکٹر خالد بشیر اور ڈپٹی ڈائریکٹر ڈاکٹر محمد عدیل سیال نے بتایا ہے کہ ضلع کی تمام مویشی منڈیوں میں محکمہ لائیو سٹاک کا تجربہ کار عملہ تعینات کیا گیا ہے جو نہ صرف منڈیوں بلکہ جانوروں کو لانے اور لیجانے والے ٹرکوں وغیرہ میں باقاعدگی سے کانگو وائرس سے بچائو اور چیچڑ مار سپرے کر رہا ہے ، اس مقصد کیلئے ٹول پلازہ پتوکی اور مصطفی آباد پر آنے اور جانیوالے جانوروں کا طبی معائنہ کر کے احتیاطی سپرے کر رہا ہے تا کہ شہریوں کو مختلف بیماریوں سے بچایا جا سکے ، اس کے علاوہ مویشی منڈیوں اور سیل پوائنٹس پر مادہ جانوروں کے حاملہ ہونے کے مفت ٹیسٹ کی سہولت بھی فراہم کی گئی ہے ۔