ماضی میں عوام نے جن کو رہنماء بنایا وہ رہزن ثابت ہوئے ،میر اسرار اللہ زہری

خضدار(اُردو پوائنٹ اخبارتازہ ترین - این این آئی۔ 16 جولائی2018ء) بلوچستان نیشنل پارٹی عوامی کے مرکزی قائد و بلوچستان اسمبلی کے حلقہ پی بی 38و39 پارٹی کے نامزد امیدوار میر اسراراللہ زہری نے کہا ہے کہ ماضی میں عوام نے جن کو رہنماء بنایا وہ رہزن ثابت ہوئے جنہوں نے نہ صرف کرپشن کی تاریخ رقم کی بلکہ گوادر اور ریکوڈک جیسے اہم منصوبوں پر بھی سودا بازی کی۔

پچیس جولائی عوام کے امتحان کا دن ہے صرف ووٹ کی طاقت سے ہی سیاسی سودا گروں کا راستہ روکا جاسکتا ہے۔ان خیالات کا اظہار انہوں نے خضدار میں مختلف عوامی وفود سے بات چیت کرتے کیا۔میر اسرار اللہ بلوچ نے کہا کہ متوسط طبقے کی نمائندگی کے دعویدار ایک نام نھاد قوم پرست پارٹی نے اقتدار میں آکر نہ صرف قومی مفادات کو نقصان پہچایا بلکہ ان کی دور میں کرپشن اور کمیشن خوری کے ریکارڈ قائم ہوئے۔

(جاری ہے)

گوادر اور ریکوڈک جیسے اہم منصوبوں سے متعلق خفیہ معاہدے کیئے گئے۔عوام کو ایسے سیاستدانوں سے ہوشیار رہنا چاہیئے۔انہوں نے کہا کہ قومی و اجتماعی مفادات کاتحفظ بی این پی عوامی کی اولین ترجیح ہے اور بی این پی عوامی کے رہنمائوں نے ہمیشہ عوام کی صحیح معنوں میں نمائندگی اور ترجمانی کی ہے۔انہوں نے کہا کہ بلوچستان کی بد قسمتی ہے کہ یہاں انتخابات میں ہمیشہ ایسے لوگ منتخب ہوکر آتے ہیں جن کو عوامی مسائل سے کوئی سروکار نہیں ہوتا۔

مسائل کے حل کے لیئے ضروری ہے کہ عوام کو ووٹ کی اہمیت بارے آگہی دی جائے اور ووٹ کی طاقت کے ذریعے کرپٹ مافیا اور خرد بُرد گروہوں کا راستہ روکا جائے۔انہوں نے کہا کہ عوام کو بلا خوف اور بلا لالچ شعور و اپنی ضمیر کی بنیاد پر فیصلہ کرنا ہوگا۔معمولی مفادات کے لیئے سیاسی تاجروں کے ساتھ سودا بازی کرکے ووٹ کی تقدس کو پامال نہ کی جائے بلکہ عوام کا فیصلہ ان امیداروں اور پارٹیوں کے حق میں آنا چاہیئے جن کی ماضی عوامی خدمت کے لحاظ سے بہتر ہو۔

انہوں نے کہا کہ بی این پی عوامی نے ووٹ کی خاطر کبھی کسی پر دبائو ڈلنے کی کوشش کی اور نہ ہی ہم کسی سے ووٹ کی بھیک مانگ کر ووٹ کی تقدس پامال کرنا چاہتے ہیں۔بی این پی عوامی کو عوامی خدمت اور عوامی منشور کی بنیاد پر ووٹ چاہیئے ۔انہوں نے کہا کہ پچیس جولائی کے انتخابات میں بی این پی عوامی بلوچستان کی سب سے مقبول جماعت بن کر ابھرے گی۔