جامعہ حکمت عملی کے تحت خضدار کے مسائل حل کرنے کی منصوبہ بندی کر رہے ہیں،جام کمال خان عالیانی

خضدار (اُردو پوائنٹ اخبارتازہ ترین - این این آئی۔ 11 ستمبر2021ء) وزیر اعلی بلوچستان جام کمال خان عالیانی نے کہا ہے کہ جامعہ حکمت عملی کے تحت خضدار کے مسائل حل کرنے کی منصوبہ بندی کر رہے ہیں۔خضدار سمیت بلوچستان کے تمام بڑے شہروں کو جلد ہی میٹرو پولیٹن کا درجہ دیا جائیگا جس کے بعد شہری مسائل مقامی سطح پر حل کئے جاسکیں گے۔ان خیالات کا اظہار انہوں نے کمشنر ہاوس خضدار میں بلوچستان عوامی پارٹی خضدار کے ایک نمائندہ وفد سے بات چیت کرتے ہوئے کیا۔

اس موقع پر ڈپٹی اسپیکر بلوچستان اسمبلی بابر موسی خیل، صوبائی وزیر سردار عارف جان محمد محمد حسنی،کمشنر قلات ڈویڑن بشیر احمد بازئی، ڈپٹی کمشنر خضدار میجر ریٹائرڈ بشیر احمد بڑیچ، ایس ایس ایس خضدار ارباب امجد کاسی بھی موجود تھے۔

(جاری ہے)

قبل ازیں بلوچستان عوامی پارٹی کے ایک وفد نے میر اخلاق احمد خدرانی، سردار بلند خان غلامانی، میر احمد خان گنگو، میر جاوید احمد خدرانی، محمد یونس گنگو،انجینئر عتیق ساجدی، اکرم بلوچ، میر عرفان گنگو،میر ایاز اللہ باجوئی,حاجی رسول بخش خدرانی، یاسر لانگو،نیاز مینگل، میر اسد غلامانی،وڈیرہ کلیم اللہ خدرانی کی قیادت میں وزیر اعلی بلوچستان سے ملاقات کی اور انہیں خضدار کے مجموعی و احتماعی مسائل سے آگاہ کیا۔

وزیر اعلی بلوچستان نے وفد سے بات چیت کرتے ہوئے کہا کہ خضدار کی بڑھتی ہوئی آبادی اور جغرافیائی اہمیت کے پیش نظر جامعہ حکمت عملی ترتیب دے رہے ہیں۔جلد ہی خضدار سمیت بلوچستان کے بڑے شہروں کو میٹروپولیٹن کا درجہ دیا جائیگا جس سے یقینا مسائل میں کمی اور شہری ترقی میں مدد ملے گی اور بہت سے مسائل مقامی سطح پر حل کیئے جاسکیں گے۔انہوں نے کہا منشیات کے عادی افراد کو معاشرے کا کار آمد فرد بنانے کے لیئے بحالی سینٹر بنائے جارہے ہیں اس حوالے سے خضدار میں بھی منشیات کے عادی افراد کے علاج کے لیئے ہسپتال قائم کی جائیگی۔

انہوں نے کہا کہ خضدار بائی پاس ترجیحات میں شامل ہے اس حوالے سے از نو سروے کرکے بائی پاس کی تعمیر کو یقینی بنایا جائیگا۔انہوں نے کہا بسیمہ این ایچ اے کا خضدار سبسیمہ سیکشن انتہائی اہمیت کا حامل منصوبہ ہے اور اس کی تکمیل سے نہ صرف عوام کو آمد و رفت میں آسانی ہوگی بلکہ خضدار کی تجارتی اہمیت میں بھی اضافہ ہوگا۔انہوں نے ہدایت کی کہ بسیمہ سیکشن کے متاثرین کو معاوضوں کی ادائیگی جلد یقینی بنائی جائے۔

وزیر اعلی بلوچستان نے کہا کہ تعلیم یافتہ نوجوانوں کو روزگار کی فراہمی اولین ترجیح ہے اور اس سلسلے میں مشتہر شدہ تمام محکمہ جات کے خالی آسامیوں پر ٹیسٹ و انٹریو کا عمل مکمل کرکے ان پر تعیناتی عمل میں لائی جائیگی اور اس حوالے سے نوجوانوں کے تحفظات دور کیئے جائیں گے۔وزیر اعلی بلوچستان جام کمال خان عالیانی نے خضدار سی ایم فنڈز سے منظور شدہ اسپورٹس کمپلیکس اور کارڈیو ہسپتال کی تعمیر شروع کرنے اور تمام زیر تکمیل بڑے اداروں کے لیئے ایک ہی جگہ زمین مختص کرنے کی ہدایت کرتے ہوئے سٹی کے لیئے دو مزید فیڈرز کی فراہمی،گریڈ اسٹیشن کے اضافے، آرکیالوجیکل میوزیم کی تعمیر،خضدار تا کنجھڑ ماڑی روڈ کی تعمیر،ٹیچنگ ہسپتال میں ڈاکٹروں اور ادویات کی کمی سمیت دیگر تمام درپیش مسائل جلد حل کرنے کی بھی یقین دھانی کرائی۔