ضلع لوئر کوہستان میں یکے بعد دیگرے دو ٹریفک حادثات کے باعث 11 افراد چل بسے

بدھ 5 مئی 2021 23:59

کوہستان(اُردو پوائنٹ اخبارتازہ ترین - این این آئی۔ 05 مئی2021ء) ضلع لوئر کوہستان میں یکے بعد دیگرے دو ٹریفک حادثات کے باعث 11 افراد چل بسے ۔ڈی پی او لوئر کوہستان ذوالفقار جدون کے مطابق شاہراہ ریشم پر لوئر کوہستان میں دو ٹریفک حادثات پیش آئے، دونوں واقعات شاہراہ ریشم پر پیش آئے، پہلا واقعہ کیرو کے قریب اس وقت پیش آیا جب ایمبولینس میں بزرگ کی لاش کو سوات منتقل کیا جارہا تھا کہ پھسلن کے باعث وہ گہری کھائی میں جا گری، دلخراش واقعے کے نتیجے میں خاتون سمیت آٹھ افرادجاں بحق ہوئے۔

(جاری ہے)

ڈی پی او کوہستان کے مطابق ایمبولینس حادثے میں جاں بحق ہونے والے تمام افراد کا تعلق ایک ہی برادری تحصیل کندیا اسگل کوہستان اپر سے ہے۔ نجی ٹی وی نے اپنی رپورٹ میں بتایاکہ ڈی پی او لوئر کوہستان کے مطابق دوسرا حادثہ گلوز بانڈہ کے قریب پیش آیا، جہاں تیز بارش کے باعث پیدا ہونے والی پھسلن کے نتیجے میں کار کھائی میں گری، واقعے میں تین افراد جاں بحق ہوئے۔حادثے کی اطلاع ملتے ہی انتظامی افسران موقع پر پہنچے، جنہوں نے امدادی ٹیموں کی مدد سے لاشوں کو نکال کر آرایچ سی پٹن منتقل کیا۔