صوبائی وزیرصنعت و تجارت سے چیئرمین یوٹیلٹی سٹورز کارپوریشن کی ملاقات،

لاہور (اُردو پوائنٹ اخبارتازہ ترین - اے پی پی۔ 22 اپریل2019ء) صوبائی وزیرصنعت وتجارت میاں اسلم اقبال سے سول سیکرٹریٹ میں چیئرمین یوٹیلٹی سٹورز کارپوریشن ذوالقرنین علی خان نے ملاقات کی۔ ملاقات میں رمضان پیکج اور رمضان بازاروں میں اشیائے خورونوش کی سستے داموں فراہمی اور رمضان پیکج کے حوالے سے یوٹیلٹی سٹورز کے ساتھ اشتراک کی حکمت عملی پر بات چیت کی گئی۔

اس موقع پر صوبائی وزیر نے گفتگو کرتے ہوئے کہا کہ ماہ رمضان کے دوران عوام کو ریلیف فراہم کرنے کے لئے حکمت عملی طے کر لی ہے۔ 25شعبان سے شروع ہونے والے رمضان بازاروںمیں عوام کو اشیائے ضروریہ رعایتی نرخوں پر فراہم کریں گے۔ رمضان بازاروں میں اشیاء کے معیار ، مقدار اور قیمتوںپر کڑی نظر رکھی جائے گی، کسی کو بھی غریب عوام کے حق کو چھیننے نہیں دیں گے، صارفین کو ریلیف کی فراہمی کے لئے یوٹیلٹی سٹورز کارپوریشن کا اشتراک بھی حاصل ہو گا۔

(جاری ہے)

انہوں نے کہا کہ تمام متعلقہ ادارے رمضان المبارک کے دوران عوام کو ریلیف کی فراہمی کے لئے متحرک انداز میں کام کریں گے اور اس کے لئے تمام اداروں کو ذمہ داریاں تفویض کر دی گئی ہیں۔ رمضان بازاروںاور عام مارکیٹوں میں اشیائے صرف کی قیمتوں پر کڑی نظر رکھی جائے گی۔ چیئرمین یوٹیلٹی سٹورز کارپوریشن نے کہا کہ رمضان المبارک کے دوران اشیائے ضروریہ کی فراہمی کے حوالے سے پنجاب حکومت کے ساتھ مکمل تعاون کریں گے۔