پاکستان خطے کے دیگر ممالک کے ساتھ مستحکم تجارتی تعلقات کو فروغ دینے کی پالیسی پر عمل پیرا ہے

لاہور (اُردو پوائنٹ اخبارتازہ ترین - اے پی پی۔ 20 اگست2019ء) فیصل آباد انڈسٹریل اسٹیٹ ڈیولپمنٹ اینڈ منیجمنٹ کمپنی (فیڈمک) کے چیئر مین میاں کاشف اشفاق نے کہا ہے کہ پاکستان خطے کے دیگر ممالک کے ساتھ مستحکم تجارتی تعلقات کو فروغ دینے کی پالیسی پر عمل پیرا ہے جس کا مقصد وزیر اعظم عمران خان کی ہدایت کے مطابق برآمدات میں اضافہ کر کے ملک کا تجارتی خسارہ کم کرنا ہے۔

فیڈمک کے بورڈ آف ڈائریکٹرز کے سالانہ اجلاس سے وڈیو لنک کے ذریعے خطاب کرتے ہوئے انہوں نے کہا کہ حکومت خصوصی اقتصادی زونز کو ترقی دینے اور ملک میں سرمایہ کاری کی حوصلہ افزائی کے لئے پرعزم ہے۔ انہوں نے کہا کہ علامہ اقبال انڈسٹریل سٹی ملکی اور غیر ملکی سرمایہ کاروں کے لئے ون ونڈو آپریشن کے تحت سرمایہ کاری کے بہترین مواقع فراہم کرتا ہے۔

(جاری ہے)

انہوں نے کہا کہ غیر ملکی سرمایہ کاری میں ٹیکنالوجی کی منتقلی کو ترجیح دی جانی چاہیے اور اس میں اس بات کو بھی یقینی بنایا جانا چاہیے کہ اس سے ملک کو فوری اور طویل مدت فوائد حاصل ہوں۔ میاں کاشف اشفاق نے کہا کہ پبلک پرائیویٹ پارٹنر شپ بھی مقامی صنعتوں کی ترقی اور غیر ملکی سرمایہ کاری کے فروغ میں خاطر خواہ مدد دے گی۔انہوں نے کہا کہ حکومت کا اقتصادی اصلاحات کا ایجنڈا بھی قابل ستائش ہے۔انہوں نے کہا کہ وہ فیصل آباد اور پورے ملک میں صنعتی انقلاب کے لئے بھرپور کردار ادا کرنے کے لئے پر عزم ہیں۔ میاں کاشف اشفاق نے ایم تھری انڈسٹریل سٹی اور علامہ اقبال انڈسٹریل سٹیٹ کی ترقی کی رفتار کو اطمینا بخش قرار دیا۔