لاہور چیمبر کے مطالبے پر پاکستان سپر لیگ کے دوران مارکیٹیں کھلی رکھنے کے فیصلے کا خیر مقدم

یہ تاجر برادری کیلئے بہترین لمحہ ہے کہ اس اقدام سے بین الاقوامی کرکٹ اور تجارتی و معاشی سرگرمیاں ا ب ایک دوسرے سے وابستہ ہیں اور یکساں جاری رہیں گے، عرفان اقبال شیخ

جمعرات 20 فروری 2020 20:42

لاہور چیمبر کے مطالبے پر پاکستان سپر لیگ کے دوران مارکیٹیں کھلی رکھنے کے فیصلے کا خیر مقدم
لاہور (اُردو پوائنٹ اخبارتازہ ترین - آن لائن۔ 20 فروری2020ء) لاہور چیمبر آف کامرس اینڈ انڈسٹری کے صدر عرفان اقبال شیخ اور نائب صدر میاں زاہد جاوید احمد نے حکومت اور قوانین نافذ کرنے والے اداروں کی جانب سے لاہور چیمبر کے مطالبے پر پاکستان سپر لیگ کے دوران مارکیٹیں کھلی رکھنے کے فیصلے کا خیر مقدم کیا ہے۔ انہوں نے ایک بیان میں کہا کہ یہ تاجر برادری کیلئے بہترین لمحہ ہے کہ اس اقدام سے بین الاقوامی کرکٹ اور تجارتی و معاشی سرگرمیاں ا ب ایک دوسرے سے وابستہ ہیں اور یکساں جاری رہیں گے۔

انہوں نے کہا کہ یہ فیصلہ نہ صرف بزنس کمیونٹی کے بہترین مفاد میں ہے بلکہ مقامی اور غیر ملکی کرکٹ شائقین کیلئے بھی جو جب بھی میچ دیکھنے قذافی سٹیڈیم آتے ہیں ،لبرٹی اور اس سے ملحقہ مارکیٹوں سے شاپنگ ضرور کرتے ہیں ۔

(جاری ہے)

لاہور چیمبر کے عہدیداروں نے کہا کہ حکومت اور قانون نافذ کرنے والے اداروں کی جانب سے یہ نئی پلاننگ تجارت و معیشت کو اربوں روپے کے بڑے نقصان سے بچائے گا۔

انہوں نے کہا کہ پاکستان میں بین الاقوامی کرکٹ کی واپسی خوشگوار علامت ہے اوراس سے دنیا بھر میں پاکستان کا مثبت عکس اجاگر ہو گا ۔ ساتھ ہی تجارتی سرگرمیوں کے معمول کے مطابق جاری رہنے سے ملک کو امن کا گہوارہ بنانے کیلئے حکومت اور سکیورٹی فورسز کی کوششیں بھی رنگ لائیں گی۔انہوں نے کہا کہ گذشتہ کچھ عرصے میں، کرکٹ میچوں کے دوران قذافی سٹیڈیم سے ملحقہ لبرٹی اور دیگر مارکیٹیں اور ریستوران بند رکھنے سے کاروباری سرگرمیوں معطل رہتی جس سے نہ صرف تاجر بلکہ یومیہ اجرت کمانے والوں کو بھی نقصان اٹھانا پڑا ، مگر اب حکومت کی جانب سے پی ایس ایل کے دوران مارکیٹیں کھلی رکھنے کے فیصلے نے سب کے دل جیت لئے ہیں۔

انہوں نے کہا کہ تاجر برادری میچوں کے دوران سکیورٹی کی صورتحال برقرار رکھنے میں حکومت کے ساتھ بھرپور تعاون کرے گی۔

لاہور میں شائع ہونے والی مزید خبریں