ایف پی سی سی آئی کا 700 میگا واٹ بجلی کے آزاد پٹن ہائیڈل پاور پروجیکٹ کی تعمیر کیلئے پاک چین معاہدے کا خیرمقدم

لاہور(اُردو پوائنٹ اخبارتازہ ترین - این این آئی۔ 08 جولائی2020ء) فیڈریشن آف پاکستان چیمبرز آف کامرس اینڈ انڈسٹری کے صدر میاں انجم نثار نے سی پیک منصوبے میں شامل 700 میگا واٹ بجلی کے آزاد پٹن ہائیڈل پاور پروجیکٹ کی تعمیر کے لئے پاک چین معاہدے کا خیرمقدم کرتے ہوئے تجویز دی ہے کہ حکومت مزید ہائیڈرو پاور پروجیکٹس کو اس منصوبے کا حصہ بنائے، ملک مہنگے اور ماحول دشمن ایندھن پر انحصار کرنے والے منصوبوں کا متحمل نہیں ہو سکتا ہے۔

اپنے بیان میں انہوں نے کہا کہ کو امید ہے کہ دریائے جہلم پر واقع یہ منصوبہ 2026 میں اپنے مقررہ وقت کے اندر مکمل ہوجائے گا اور ملک کے کئی دیگر ہائیڈرو پاور منصوبوں کی طرح اس میں تاخیر نہیں ہوگی۔انہوں نے مزید کہا کہ یہ عام عوام اور کاروباری برادری کے لئے خصوصی طورایک خوشخبری ہے کیونکہ نیا منصوبہ ملک کو سستی اور گرین انرجی کی طرف گامزن کرنے کے قابل بنائے گا، جس سے مقامی ملازمت کے مواقع پیدا کرنے کے علاوہ 1.5 بلین ڈالر کی مقامی اور بیرونی سرمایہ کاری کے مواقعے پیدا ہو گئے۔

(جاری ہے)

میاں انجم نثار نے کہا کہ ملک میں پانی کے ذخیرے تیار کرکے پانی دستیاب ہوجائے تو زیادہ سے زیادہ 20 ملین ایکڑ بنجر اراضی کو قابل کاشت بنایا جاسکتا ہے۔ اس کے علاوہ کالاباغ ڈیم کی جلد تعمیر بھی کی جائے جو قومی معیشت کے لئے سب سے موزوں منصوبہ ہے کیونکہ اس سے سستی اور کافی بجلی پیدا ہوگی۔انہوں نے کہا کہ تاجر برادری سمیت تمام اسٹیک ہولڈرز پانی، خوراک اور توانائی کے تحفظ کے لئے قومی واٹر پالیسی کو عملی جامہ پہنانے کے لئے اپنا بھر پور کردار ادا کرنے کے لئے تیار ہیں۔انہوں نے کہا کہ کالا باغ ڈیم کو کسی بھی قیمت پر نظرانداز نہیں کیا جانا چاہئے کیونکہ پانی کی قلت ہو رہی ہے۔ کالاباغ ڈیم کی مخالفت کرنے والے زمینی حقائق سے لاعلم ہیں۔