تھانہ نشتر ٹائون کی زیر حراست خاتون ملزمہ نے مبینہ طو رپر چھت سے کود کر خود کشی کر لی

لاہور(اُردو پوائنٹ اخبارتازہ ترین - این این آئی۔ 19 جولائی2018ء) تھانہ نشتر ٹائون پولیس کی زیر حراست خاتون ملزمہ نے مبینہ طو رپر چھت سے کود کر خود کشی کر لی ۔نجی ٹی وی نے ذرائع کے حوالے سے بتایا ہے کہ تھانہ نشتر ٹائون کے انوسٹی گیشن سیل نے خاتون ملزمہ زیبا کامران کو اپنے شوہر کے اغواء کے مقدمہ میں گرفتار کر رکھا تھا ۔ گزشتہ روز اسے ریکوری کے لئے رنگ روڈ کے قریب لیجایا گیا جہاں اس نے چھت سے کود کر خود کشی کر لی ۔

علاوہ ازیںشاد باغ میں 16سالہ لڑکی نے مبینہ طور پر گھریلو حالات سے دلبرداشتہ ہو کر زندگی کا خاتمہ کر لیا ۔پولیس کے حوالے سے بتایاگیا ہے کہ 16سالہ آسیہ نامی لڑکی اپنی سوتیلی ماں سے کسی بات کو لے کر جھگڑتی ہوئی اپنے کمرے میںچلی گئی اوراندر سے دروازہ بھی بند کرلیا۔

(جاری ہے)

صبح دروازہ نہ کھلنے پر گھر والوں کے دروازہ کھٹکھٹانے پر بھی کوئی جواب موصول نہ ہونے پر دروازہ توڑ کر اندرداخل ہوکر دیکھا تو لڑکی پنکھے کے ساتھ اپنے دوپٹے کا پھندا لگا ئے لٹک رہی تھی ۔

پولیس نے لاش پوسٹمارٹم کے لئے مردہ خانے منتقل کر کے تحقیقات شروع کر دی ہیں ۔ ایک اور واقعہ میں نشتر کالونی سے نا معلوم شخص کی بوری بند لاش برآمد ہوئی ہے ۔ پولیس کے مطابق مقتول کو ہاتھ اور پائوں باندھ کر قتل کرنے کے بعد لاش کو بوری میں بند کر کے پھینکا گیا ۔ پولیس نے لاش کو پوسٹمارٹم کے لئے مردہ خانے منتقل کر کے مقتول کی شناخت اور ملزمان کی گرفتاری کے لئے کوششیں شروع کر دی ہیں ۔

علاوہ ازیں فیکٹری ایر یا کے علاقہ سے 26سالہ نامعلوم نوجوان کی لاش برآمد ہوئی ۔خیابان اقبال گورمے بیکری کے سامنے گلی میں 26سالہ نوجوان کی پڑی ہوئی لاش دیکھ کر علاقہ مکینوں نے پولیس کو اطلاع کردی جس پر انہوں نے پہنچ کر لاش اپنی تحویل میں لے کر شناخت نہ ہونے پرمردہ خانے بھجوادی۔پولیس کے مطابق مرنے والا حلیے سے نشی معلوم ہوتا تھا اور اس کی موت نشہ کی زیادتی سے ہوئی ہے۔

ایک اور واقعے میں مناواں کے علاقہ میں معمولی جھگڑے پر مدرسے کے طالبعلم نے دوسرے کا گلا دبا کر مار دیا۔دینی درسگاہ میںمعمولی سی بات کو لے کر معید اور حسین علی نامی طالبعلموں میں جھگڑا ہوگیاجس پر حسین علی نامی طالب علم نے معید کا گلادبادیا جو کہ دم گھٹنے کی وجہ سے چل بسا ۔واقعہ کی اطلاع ملنے پر فوری پولیس نے پہنچ کر لاش اپنی تحویل میںلے کر پوسٹ مارٹم کے لیے بھجوادیا۔پولیس نے مقتول کے لواحقین کی درخواست پر قتل کی دفعات لگاتے ہوئے مقدمہ درج کرکے ملزم کو حراست میں لے لیا۔اس کے ساتھ ساتھ مدرسے کے قاری صابر کو بھی لواحقین کے کہنے پر کہ وہ موقع پر موجود ہونے کے باوجود اس لڑائی کو نہیں چھڑوا سکا کو حراست میں لے لیا۔