کیپٹن (ر) صفدر کو بیرون ملک بھیجنے کی تیاریاں

لاہور (اُردو پوائنٹ اخبارتازہ ترین۔ 26 ستمبر2018ء) سابق وزیر اعظم نواز شریف کے داماد کیپٹن ریٹائرڈ صفدر کی طبیعت خراب ہو گئی ہے۔میڈیا رپورٹس کے مطابق طبیعت خراب ہونے پر انہیں اسپتال منتقل کیا گیا ہے۔کیپٹن ریٹائرڈ صفدر کے معدے اور دل میں تکلیف ہے۔ڈاکٹرز کا کہنا ہے کہ کیپٹن (ر) صفدر کو علاج کے لیے بیرون ملک منتقل کیا جا سکتا ہے۔چار روز قبل بھی پاکستان مسلم لیگ ن کے رہنما کیپٹن ریٹائرڈ صفدر کی طبعیت خراب ہوئی تھی۔

یاد رہے کہ اس سے قبل اڈیالہ جیل میں بھی کیپٹن (ر) صفدر کی طبیعت خراب ہوئی تھی۔ کیپٹن (ر) صفدر کی طبیعت خراب ہونے پر راولپنڈی ڈسٹرکٹ اسپتال سے ڈاکٹرز کا عملہ اڈیالہ جیل پہنچا اور اڈیالہ جیل میں ڈاکٹرز کیپٹن (ر) صفدر کا طبی معائنہ کیا گیا۔ جیل ذرائع کے مطابق کیپٹن (ر) صفدر پیٹ کی تکلیف کی وجہ سے بیمار ہوئے۔

(جاری ہے)

یاد رہے کہ سابق وزیراعظمنواز شریف ،،مریم نواز اور کیپٹن (ر) صفدر کو ایون فیلڈ ریفرنس کیس میں نیب عدالت نے سزا دی تھی جس کے تحت سابق وزیراعظم نواز شریف کو 11 اور ان کی صاحبزادی مریم نواز کو 8 جب کہ داماد کیپٹن (ر) صفدر کو ایک سال قید کی سزا سنائی گئی۔

احتساب عدالت کے جج محمد بشیر نے فیصلے میں نوازشریف کو 80 لاکھ پاؤنڈ اور مریم نواز کو 20 لاکھ پاؤنڈ جُرمانہ بھی عائد کیا اور ایون فیلڈ اپارٹمنٹس کو ضبط کرنے کا بھی حکم دیا جب کہ عدالت نے کیپٹن (ر) صفدر پرکوئی جُرمانہ عائد نہیں کیا۔ سابق وزیراعظم نواز شریف کے داماد کیپٹن (ر) صفدر کو 9 جولائی کو اڈیالہ جیل منتقل کیا گیا تھا۔ کیپٹن (ر) صفدر 74 دن اڈیالہ جیل میں قید رہے ۔

تینوں مجرموں نے سزاؤں کے خلاف اسلام آباد ہائیکورٹ میں اپیلیں دائر کیں، جن کو سماعت کے لیے منظور کرتے ہوئے 19 ستمبر کو اسلام آباد ہائیکورٹ نے تینوں مجرموں کی سزا معطل کرنے اور انہیں رہا کرنے کا حکم دیا۔ عدالت نے تینوں قیدیوں کو 5،5 لاکھ روپے کے ضمانتی مچلکے بھی جمع کروانے کا حکم دیا جس کے بعد انہیں خصوصی طیارے سے لاہور لایا گیا جہاں پارٹی رہنماؤں اور کارکنوں نے ان کا شاندار استقبال کیا۔ سابق وزیراعظم نواز شریف ، ان کی صاحبزادیمریم نواز اور داماد کیپٹن (ر) صفدر اڈیالہ جیل میں ہی مقیم ہیں۔ کیپٹن (ر) صفدر کی آج جاتی امرا میں طبیعت خراب ہوئی، کیپٹن (ر) صفدر کو معدے میں شدید تکلیف ہوئی جس پر انہوں نے ڈاکٹرز سے رجوع کر لیا۔