رکن قومی اسمبلی اسماء حدید کی اپنی متنازع تقریر پر وضاحت

لاہور(اُردوپوائنٹ اخبارتازہ ترین۔12 نومبر 2018ء) تحریک انصاف کی رکن قومی اسمبلی اسماء حدید نے اپنی متنازع تقریر پر وضاحت پیش کردی ہے۔ انہوں نے کہا کہ اسرائیل سے تعلقات کی بات مسلمانوں کی قتل وغارت روکنے کیلئے کی تھی، نبی پاک ﷺ کے علاوہ کسی کوفالو نہیں کرتی ہوں ، چاہے آپ مجھے جتنی بھی ماڈرن سمجھیں۔انہوں نے اپنے وضاحتی ویڈیو پیغام میں کہا کہ سوشل میڈیا پر میری جو ویڈیو چل رہی ہے ۔

میں اپنے بہن بھائیوں کو دوبارہ کلیئر کردیتی ہوں کہ قومی اسمبلی میں اسرائیلی طیارہ پاکستان میں آنے سے متعلق بحث ہورہی تھی ۔اس مسئلے پر ایوان میں کافی گرما گرمی ہوئی اور علماء کرام جھگڑے میں آگئے اور پھر سب لڑنے لگ گئے۔پھر میں نے سوچا کہ ان کو میں تھوڑا بتاتی ہوں کہ جس طرح آپ سب یہاں غصہ دکھا رہے ہو اور لڑ رہے ہو، آپ سب کیوں نہیں چلے جاتے اور یہودیوں سے مسلمانوں کی جان چھڑوا لیتے ہو؟انہوں نے کہا کہ میرا کہنے کا مطلب یہ تھا کہ آپ کوئی بھی طریقہ اختیار کرلیں جس سے ہمارے بچے اور عورتیں ذبح ہونا بند ہوجائیں ۔

(جاری ہے)

اس لیے میں نے کہا تھا کہ آپ علماء کرام جب یہودیوں کی بات آتی ہے تولڑنا شروع کردیتے ہیں ۔کشمیریوں کی بات آتی ہے توبھی ہم آپس میں لڑنے کیلئے تیار ہوتے ہیں۔لیکن مظلوموں کومارنے والوں کوکوئی نہیں مارتا۔اسماء حدید نے کہا کہ میں نے اس پر ایوان میں تجویز دی کہ آپ قتل وغارت کرنے والوں کوکسی بھی طرح منا لو۔ انہوں نے کہا کہ میں نے نبی پاک ﷺ کی تعلیمات کی روشنی میں بھی بتایا۔

کیونکہ میں نبی پاک ﷺ کے علاوہ کسی کوفالو نہیں کرتی ہوں ، اور قرآن پاک کے علاوہ میں کوئی بھی کام نہیں کرسکتی چاہے آپ مجھے جتنی بھی ماڈرن سمجھیں۔