ہر افسرشفافیت ،ایمانداری ،خود احتسابی اورملک و قوم کی خوشحالی کیلئے کام کرے، اب سستی کی کوئی گنجائش نہیں ،

لاہور۔20 جولائی(اُردو پوائنٹ اخبارتازہ ترین - اے پی پی۔ 20 جولائی2019ء) وزیراعلیٰ پنجاب سردار عثمان بزدارنے کہا ہے کہ ہر افسرشفافیت، فعالیت، ایمانداری ،خود احتسابی اورملک و قوم کی خوشحالی کیلئے کام کرے‘ اب باتیں بنانے یا سستی کی کوئی گنجائش نہیں‘وطن کو عظیم تر بنانے کیلئے پوری قوم کو متحرک کرنا ہوگا۔ سول سیکرٹریٹ دربارہال میں سرکاری افسروں سے خطاب کرتے ہوئے وزیراعلیٰ پنجاب سردار عثمان بزدار نے کہا کہ عوام کی فلاح وبہبود ،گڈ گورننس اورمالی شفافیت کیلئے بھر پور کردارادا کرنے والے افسروں پر ناز ہے‘کپتان کے لئے ٹیم کا انتخاب بے حد اہمیت کا حامل ہوتا ہے‘ میری ٹیم میں لوگ سفارش کی بنا پر نہیں آئے بلکہ خداداد صلاحیتوں کی بدولت ٹیم کا حصہ بنے۔

انہوںنے کہا کہ حکومت پنجاب کی نیک نامی اورساکھ بنانے میں کردارادا کرنے والوں کو فراموش نہیں کرسکتا۔

(جاری ہے)

پنجاب ملک کے دیگر صوبوں میں ہر لحاظ سے نمایاں نظر آتا ہے ۔حکومت کی اچھی یا بری ساکھ بنانے میں پبلک سرونٹ کا کردارکلید ی اہمیت کا حامل ہے ۔ملازمین محنت اورایمانداری کا مظاہرہ کرے تو گڈگورننس کا تاثر ابھرتا ہے اوررائے عامہ حکومت کے حق میں ہوجاتی ہے ۔

انہوںنے کہا کہ عوامی فلاح وبہبود کے منصوبے اوربہتر ڈلیوری پبلک سرونٹ کی محنت کی مرہون منت ہے ۔پاکستان کے سول سروس پیشہ ورانہ مہارت اورفعالیت کے لحاظ سے آج بھی بہترین ہیں ۔سروس ڈلیور ی کے امور کو بہتر بنانے کیلئے سول افسروں کے پے پیکیج پر توجہ دے رہے ہیں ۔انہوںنے کہا کہ مالی مشکلات کے باوجود پولیس ،ڈاکٹروں ،انجینئروں اورسول ایڈمنسٹریشن کو پیکیج دیں گے۔

گڈگورننس کیلئے ڈاکٹروں ،انجینئروں ،پولیس اورایڈمنسٹریشن کو مراعات دے رہے ہیں۔چیف سیکرٹری یوسف نسیم کھوکھر نے اس موقع پرخطاب کرتے ہوئے کہا کہ سرکاری افسروں کیلئے جتنے موزوںحالات آج ہیں پہلے نہیں تھے ۔سرکاری افسران حکومت کے ویژن کو آگے بڑھانے کیلئے توقعات پر پورا اتریںگے۔اجلاس سے سیکرٹری فارسٹ،سیکرٹری اطلاعات و ثقافت،کمشنرز اورڈی سی نے بھی خطاب کیا ۔اجلاس میں صوبائی وزراء ہاشم جواں بخت، پیر سید سعید الحسن شاہ اور صوبائی انتظامیہ کے اعلی افسران نے شرکت کی-