شیخ رشید کی زیر صدارت ریلوے ہیڈ کوارٹر میں اجلاس،سینئر افسران کی شرکت

ہفتہ 19 اکتوبر 2019 19:59

لاہور (اُردو پوائنٹ اخبارتازہ ترین - آن لائن۔ 19 اکتوبر2019ء) وفاقی وزیر ریلوے شیخ رشید کی زیر صدارت ریلوے ہیڈکوارٹر میں ایک اعلیٰ سطحی اجلاس منعقد ہوا۔ جس میں چیئرمین ریلوے چیف ایگزیکٹو آفیسر ریلوے، آئی جی پولیس ریلوے سمیت دیگر افسران نے شرکت کی۔ اجلاس میں سی ای او ریلوے نے ترقیوں کی آمد و رفت میں تاخیر سے متعلق بریف کرتے ہوئے بتایا کہ مسافر ٹرینوں کی آمد و رفت کا شیڈول معمول پر آچکا ہے۔

(جاری ہے)

اجلاس میں کراچی، لاہور اور راولپنڈی ریلوے سٹیشنوں پر فوڈ سٹریٹ بنانے اور بوگیوں کی مرمت کروانے کے بارے میں بھی بریفنگ دی۔ اس موقع پر وفاقی وزیر ریلوے کا کہنا تھا کہ ٹرینوں کی بروقت آمد اور روانگی پر انکا فوکس ہے۔ اگر مسافر ٹرینوں کا شیڈول واقعی ٹھیک کرلیا گیا ہے تو اس کو برقرار رکھا جانا چاہئے۔ شیخ رشید نے ہدایت کی کہ پاکستان ریلوے کے پاس جو قیمتی اراضی ہے اسے استعمال میں لایا جائے۔ انہوں نے کہا کہ انہوں نے ریلوے کے شعبہ مارکیٹ پر اپنی نظر مرکوز کر رکھی ہے۔ اگر ریلوے کمائے گا تو مزدوروں کے چولہے جلیں گے اور مسافروں کو سہولتیں فراہم کی جاسکیں گی۔