ڈی جی فوڈ اتھارٹی کی سربراہی میں سپیشل آپریشن ٹیموں کی کارروائی

آلائشوں سے تیل بنانے والی2یونٹس سیل ‘5ہزار لیٹر سے زائد تیار تیل برآمد

منگل 22 اکتوبر 2019 23:30

لاہور۔22 اکتوبر(اُردو پوائنٹ اخبارتازہ ترین - اے پی پی۔ 22 اکتوبر2019ء) ڈائریکٹر جنرل پنجاب فوڈ اتھارٹی کیپٹن(ر) محمد عثمان کی سربراہی میں سپیشل آپریشن ٹیموں نے بڑی کارروائی کرتے ہوئی2فیٹ رینڈرنگ یونٹس کو جڑ سے اًکھاڑ دیا۔بھاری مقدار میں آلائشیں اور چربی سے تیار شدہ تیل ضبط کر لیاگیا ۔تفصیلات کے مطابق ڈی جی فوڈ اتھارٹی کی سربراہی میں سپیشل آپریشن ٹیموں نے صحت دشمن عناصر کی سرکوبی کیلئے بڑی کارروائی کی۔

لاہور کے علاقے شیرا کوٹ میں آلائشوں سے تیل تیار کرنے پر2فیٹ رینڈرنگ یونٹس کوسیل کر دیا‘فوڈ سیفٹی ٹیموں نے یونٹس کو جڑ سے اکھاڑتے ہوئے 5ہزار400 لیٹرآلائشیں، چربی سے تیارکردہ تیل اور15بڑے کڑاہے ضبط کر لیے۔مزید برآںموقع سے 4 افرادکو پولیس کے حوالے کرتے ہوئے مقدمات بھی درج کروادیے۔

(جاری ہے)

ڈی جی فوڈ اتھارٹی کا کہنا تھا کہ بائیو ڈیزل کمپنی کو آئل نہ دینے اور سپلائی کے ریکارڈ کی عدم موجودگی پر کارروائی عمل میں لائی گئی‘فیٹ رینڈرنگ یونٹس پرآلائشوں سے تیارکردہ آئل کو استعمال شدہ کوکنگ آئل میں ملا کر کے دوبارہ فروخت کیا جا تا تھا۔

کیپٹن(ر)محمد عثمان کا مزید کہنا تھا کہ آلائشوں سے نکلا تیل ماحول کو آلودہ کرنے کے ساتھ ساتھ متعدد موذی بیماریوں کا باعث بنتا ہے۔ انہوں نے واضح کیا کہ پنجاب فوڈاتھارٹی قوانین کے تحت آلائشوں سے نکلے تیل کی صرف بائیو ڈیزل بنانے میں استعمال کی اجازت ہے۔