ریاست مدینہ ہماری منزل ہے،جس کو پانے کیلئے راستوں کا تعین کیاجارہا ہے،گزشتہ ایک سال کے دوران پاکستان کا وقار اورعزت دنیا بھر میں تسلیم کی گئی ہے ،کالے بادل چھٹ چکے ہیں ، پاکستان دنیا کے سامنے ایک خوبصورت اور دلکش جزیرہ کی مانند ابھر کر سامنے آیا ہے

لاہور۔21 نومبر(اُردو پوائنٹ اخبارتازہ ترین - اے پی پی۔ 21 نومبر2019ء) صدرمملکت ڈاکٹرعارف علوی نے کہا ہے کہ ریاست مدینہ ہماری منزل ہے،جس کو پانے کے لیے راستوں کا تعین کیاجارہا ہے،گزشتہ ایک سال سے پاکستان کا وقار اورعزت دنیا بھر میں تسلیم کی گئی ہے ،کالے بادل چھٹ چکے ہیں اور پاکستان دنیا کے سامنے ایک خوبصورت اور دلکش جزیرہ کی مانند ابھر کر سامنے آیا ہے۔

ان خیالات کا اظہار انہوںنے گزشتہ روز اقبال اکادمی پاکستان کے زیر اہتمام نو روزہ علامہ اقبال عوامی میلہ اور بک فیئر کی تقریب تقسیم انعامات اور’’ ریاست مدینہ ،مملکت پاکستان اور فکر اقبال‘‘ سیمینار سے مشترکہ طورپرخطاب کرتے ہوئے کیا۔اس موقع پر صوبائی وزیرسکولز ایجوکیشن ڈاکٹر مراد راس،پی ٹی آئی کے مرکزی رہنما اعجاز چودھری،عبدالمنان خرم ،شعیب صدیقی اور اقبال اکادمی کے مرکزی عہدیداران ظہیر احمد سمیت دیگر بھی موجود تھے۔

(جاری ہے)

صدر مملکت ڈاکٹرعارف علوی نے کہا اقبال کا فکر جو کہ امت مسلمہ کو متحد اور اکٹھا رہنے کی بات کرتا ہے دراصل ہم سب کی منزل ہے اقبال کی جانب سے پیش کیے جانے والا دو قومی نظریہ آج بھی زندہ ہے جس کی مثال بھارتی وزیراعظم نریندر مودی نے مسلمانان ہند اور کشمیریوں پر ظلم وستم ڈھا کر قائم کررکھی ہے ۔انہوںنے کہا کہ مودی آج اس گڑھے میں گر چکا ہے جس سے ہم نکل چکے ہیں آج بھی بھارت میں ہر اقلیت کو شہریت ملتی ہے ان کے تحفظ کو یقینی بنانے کی باتیں کی جاتی ہیں مگر مسلمانوں کو یکسر ہر سطح پر مسترد کیاجارہا ہے ان کو انتہائی اذیت ناک زندگی فراہم کی جارہی ہے تاہم ضرورت اس بات کی ہے کہ ہم ریاست مدینہ کے قیام جو کہ ہمارا خواب بھی ہے اور منزل بھی مساوات کو قائم کریں جس کے لیے ہمیں خلفاء راشدین سے بھی سبق لینا ہے اور سنت رسول پر مکمل طورپر عمل پیرا ہونا ہے۔

انہوںنے کہا کہ آج کے نوجوان کو فکر اقبال سے ہم آہنگ کرنے کی ضرورت ہے جس کے لیے حکومت نے نصاب میں اقبالیات کو شامل کیاہے ہماری طاقت ہماری نوجوان نسل ہے یہی وہ ہونہار ہیں جن کی بدولت ملک وقوم کی ترقی و خوشحالی یقینی بنتی رہی ہے اور بنے گی جہاں تک ریاست کی بات ہے تو پی ٹی آئی پاکستان کو جدید اسلامی جمہوریہ پاکستان بنانا چاہتے ہیں جس میں عوامی فلاح بھی ہے اور یہاں بسنے والے انسانوں کی جان ومال کا تحفظ بھی ہے جس کے لیے دنیا بھر کے جدید علوم کو ہونہاروں تک پہنچایا جارہا ہے۔اس موقع پر صدر مملکت عارف علوی نے مندوبین میں یادگاری شیلڈز بھی تقسیم کیں۔