بدھ تک چیف الیکشن کمشنراور ممبران کی تقرریوں کا امکان

لاہور(اردوپوائنٹ اخبارتازہ ترین۔ 08 دسمبر 2019ء) وزیر دفاع پرویز خٹک نے کہا ہے کہ چیف الیکشن کمشنراورممبران کی تقرریوں کا فیصلہ ہوجائےگا، چیف الیکشن کمشنراورممبران سے متعلق اپوزیشن اوراتحادی جماعتوں سے رابطے مکمل ہوچکے ہیں، انہوں نے نجی ٹی وی سے خصوصی گفتگو کرتے ہوئے کہا کہ آرمی چیف کی مدت ملازمت سے متعلق اپوزیشن سے ابھی تک بات چیت نہیں ہوئی۔

تفصیلی فیصلہ آنے کے بعد لیگل ٹیم کے ساتھ مل کر حکومت فیصلہ کرے گی۔ انہوں نے کہا کہ چیف الیکشن کمشنراورممبران سے متعلق اپوزیشن اوراتحادی جماعتوں سے رابطے ہوچکے ہیں۔ بدھ تک چیف الیکشن کمشنراورممبران کی تقرریوں کا فیصلہ ہوجائےگا۔ پرویز خٹک نے کہا کہ عمران خان سے کوئی رکن قومی اسمبلی نالاں نہیں لیکن گلے شکوے ہوتے رہتے ہیں۔

(جاری ہے)

گلے شکوے کا مطلب یہ نہیں، کہ حکومت کا تختہ الٹا دیا جائے۔ عمران خان کی حکومت پانچ سال پورے کرے گی۔ انہوں نے کہا کہ عمران خان کہتے ہیں کرپٹ لوگوں کو نہیں چھوڑوں گا۔ تمام ارکان اسمبلی حکومت کے ساتھ ایک پیج پر ہیں۔ واضح رہے سینئر تجزیہ کار ڈاکٹر شاہد مسعود نے انکشاف کیا ہے کہ عمران خان کے خلاف اگر تحریک عدم اعتماد آتی ہے تو پی ٹی آئی کے اپنے 20 سے 25 ارکان ووٹ نہیں دیں گے، پی ٹی آئی میں ایسے ارکان ہیں، جو عمران خان کا ساتھ چھوڑ دیں گے، یہ اتحادیوں کی بات نہیں کررہا ، بلکہ یہ اراکین تحریک انصاف کے اپنے ہیں۔

اگر وزیراعظم عمران خان کے خلاف تحریک عدم اعتماد آتی ہے تو پی ٹی آئی کے اپنے ارکان ساتھ چھوڑ دیں گے، یہ ارکان کسی بیماری یا دیگر وجوہات کی بناء پر ووٹ نہیں کریں گے، ووٹوں کی گنتی میں 25 تک ارکان غائب ہوں گے۔انہوں نے کہا کہ یہ خبر ہے عمران خان کو چاہیے کہ اپنے ذرائع سے ان کے پاس ایجنسیاں بھی ہیں، اس خبر کو چیک کروا لیں،کہ متعدد ارکان اپنے قبلے تبدیل کرنے کیلئے تیار بیٹھے ہیں۔