بھولنے کا مرض موت کی وجہ بن گیا

کراچی (اردو پوائنٹ اخبارتازہ ترین 19 جنوری 2020) : بھولنے کا مرض موت کی وجہ بن گیا، بروین بی بی صبح اٹھ کر چولہا چلایا تو اسے بند کرنا بھول گئیں، جب واپس کچن میں جا کر آگ جلائی تو دھماکہ ہو گیا جس کی وجہ سے مذکورہ خاتون جاں بحق ہو گئیں۔ تفصیلات کے مطابق کراچی کے علاقے گلشن اقبال بلاک 5 میں واقع گھر میں آگ لگ گئی جس کے نتیجے میں ایک ضعیف خاتون جان کی بازی ہار گئیں جبکہ آتشزدگی کی وجہ سے بیڈ روم اور کچن جل کر خاکستر ہوگیا ،آتشزدگی کی اطلاع ملتے ہی فائر بریگیڈ موقعے پر پہنچ گئی اور آگ پر مکمل طورپر قابو پا لیا۔

اس حوالے سے پولیس کا کہنا ہے کہ خاتون کی شناخت 70 سالہ پروین بی بی کے نام سے ہوئی ہے ، اہلخانہ نے کہا کہ جس وقت گھر میں دھماکے سے آگ لگی تو مذکورہ خاتون کے علاوہ ان کے شوہر اور بیٹی اوپروالی منزل پر موجود تھے اور ان کی آنکھ دھماکے کی وجہ سے کھلی جبکہ پروین بی بی خود گراؤنڈ فلور پر کچن سے ملحقہ کمرے میں سو رہی تھیں اور انھیں بھولنے کی بھی عادت تھی جو اس واقعے کی وجہ بنی۔

(جاری ہے)

پولیس کا کہنا ہے کہ مذکورہ خاتون نے صبح اپنے لیے چائے بنائی اور گیس کا چولہا کھلا چھوڑ دیا جس کے بعد وہ دوباہ کچن میں گئیں تو گیس جمع ہونے کی وجہ سے جیسے ہی انھوں نے آگ جلائی دھماکہ ہو گیا جس کے وجہ سے ان کے کپڑوں میں بھی آگ لگ گئی اور وہ اپنی جان بچانے کے لیے بیڈ روم میں بھاگیں تو وہاں بھی آگ لگ ، پولیس نے جانچ کے بعد لاش ورثہ کے حوالے کردی۔