صوبائی وزیرصحت کا جی سی یونیورسٹی کالا شاہ کاکو کیمپس میں قائم کوروناوائرس فیلڈہسپتال کا دورہ‘سہولیات کا جائزہ لیا،

لاہور۔10 اپریل(اُردو پوائنٹ اخبارتازہ ترین - اے پی پی۔ 10 اپریل2020ء) صوبائی وزیرصحت ڈاکٹریاسمین راشدنے جمعہ کے روز جی سی یونیورسٹی کالا شاہ کاکو کیمپس میں قائم کوروناوائرس فیلڈہسپتال کا دورہ کیا۔وائس چانسلرپروفیسرڈاکٹراصغرزیدی اورایڈیشنل سیکرٹری ڈویلپمنٹ محکمہ پرائمری اینڈسیکنڈری ہیلتھ کئیرعمرفاروق سمیت ضلعی انتظامیہ کے افسران بھی اس موقع پر موجودتھے۔

صوبائی وزیرصحت ڈاکٹریاسمین راشدنے قائم کئے گئے 200 بستروں پرمشتمل نئے فیلڈہسپتال میں کوروناوائرس کے کنفرم مریضوں کیلئے طبی سہولیات کاجائزہ لیا‘ وی سی جی سی یونیورسٹی اورایڈیشنل سیکرٹری ڈویلپمنٹ نے صوبائی وزیرکوفیلڈہسپتال میں مہیاکی جانے والی طبی سہولیات کی تفصیلات سے آگاہ کیا۔اس موقع پر صوبائی وزیرصحت نے کہا کہ کالاشاہ کاکوکے قرنطینہ سنٹرسے کنفرم مریضوں کوعلاج معالجہ کیلئے کالاشاہ کاکوفیلڈہسپتال منتقل کیاجائیگا‘ فیلڈہسپتال میں بیک وقت کوروناوائرس کے 200کنفرم مریضوں کوعلاج کی سہولت مہیاہوگی‘اس وقت میوہسپتال میں کوروناوائرس کے سب سے زیادہ مریض زیرعلاج ہیں۔

(جاری ہے)

ڈاکٹریاسمین راشدنے کہا کہ حکومت کوروناوائرس سے پیداہونے والی ہنگامی صورتحال سے نمٹنے کی مکمل صلاحیت رکھتی ہے۔ لاک ڈاون بڑھانے کافیصلہ 14اپریل کے بعدکیاجائے گا۔ انہوں نے کہا عوام احتیاطی تدابیرپرسختی سے عملدرآمدکریں۔انہوں نے کہاکہ جنوبی پنجاب کی نسبت شمالی پنجاب میں کوروناوائرس کے کیسززیادہ تعدادمیں سامنے آرہے ہیں۔ حکومت کوروناوائرس کی موجودہ صورتحال میں بھی فوڈسپلائی جاری رکھے ہوئے ہے ۔

انہوں نے کہاکہ پنجاب بھرمیں چالیس سے زیادہ کوروناوائرس کے کنفرم مریض صحت یاب ہوکراپنے گھروں کوواپس جاچکے ہیں‘لاہور، راولپنڈی، گوجرانوالہ، گجرات اورجہلم میں کوروناوائرس کی صورتحال کاروزانہ کی بنیادپرجائزہ لیاجارہاہے۔ ڈاکٹریاسمین راشد نے کہاکہ حکومت کوروناوائرس سے بے روزگارہونے والے مزدوراوردیہاڑی دارطبقے کی بحالی کیلئے اقدامات اٹھارہی ہے۔ وائس چانسلر جی سی یونیورسٹی پروفیسر اصغر زیدی نے کہاکہ کورونا وائرس کی وجہ سے نفسیاتی مسائل کا سامنا کر رہے لوگوں کیلئے جی سی یونیورسٹی لاہور نے خصوصی ہیلپ لائن قائم کی ہے۔ انہوں نے کہا کہ یونیورسٹی کا شعبہ کیمیا ہسپتالوں کے لئے ڈس انفیکٹینٹ سپرے بھی فراہم کر رہا ہے۔