مریم نواز کا کل سے ’’شیر جوان‘‘ تحریک کا آغاز کرنے کا اعلان

لاہور(اردوپوائنٹ اخبارتازہ ترین۔ 31 اکتوبر2020ء) پاکستان مسلم لیگ ن کی نائب صدر مریم نواز نے کل سے ’’شیر جوان‘‘ تحریک کا آغاز کرنے کا اعلان کردیا، انہوں نے کہا کہ کل آپ کے بڑے قائداعظم کی تحریک آزادی کا ہراول دستہ تھے، آج آپ کو قائداعظم کے اصولوں، آئین کی بالادستی اور ووٹ کو عزت دو کیلئے میدان میں آنا ہے، شیر جوان، ملک کی آن، قوم کی شان ہے۔

انہوں نے مائیکروبلاگنگ کی ویب سائٹ ٹویٹر پر اپنے ٹویٹ میں کہا کہ کل انشاءاللہ ’’شیر جوان‘‘ تحریک کا آغاز ہو رہا ہے۔ یہ آپ کی تحریک ہے۔ آپ جو قوم کا بازو، قوم کی آواز، قوم کی تقدیر اور قوم کا مستقبل ہیں۔ انہوں نے کہا کہ کل آپ کے بڑے قائداعظم کی قیادت میں تحریک آزادی کا ہراول دستہ تھے۔  مریم نواز نے کہا کہ آج آپ نے قائداعظم کے اصولوں جمہوریت، آئین کی بالادستی اور ووٹ کو عزت دو کے لئے میدان میں آنا ہے۔

(جاری ہے)

انہوں نے اپنے پیغام میں کہا کہ اٹھیے اپنی اور ملک کی تقدیر بدلنے کے لئے اس تحریک کا حصہ بنیے۔ اپنے فیصلے اپنے ہاتھوں میں لیجئے۔ شیر جوان، ملکی کی آن، قوم کی شان۔  دوسری جانب معاون خصوصی برائے سیاسی ابلاغ ڈاکٹر شہباز گِل نے مریم اورنگزیب کے بیان پر ردعمل کا اظہار کرتے ہوئے کہاہے کہ بے شرمی کی انتہاؤں کو چھوتی ن لیگ نے کل ملک دشمنی کی نئی تاریخ رقم کی۔

اپنے بیان میں انہوں نے کہا کہ درباری میاں مفرور کے ریاست مخالف بیانیے کی ترویج میں مصروف ہیں، ن لیگ پوری قوم سے معافی مانگے۔ انہوں نے کہا کہ پی ڈی ایم کے ذریعے ہندوستان کا بیانیہ پھیلانے کی بھونڈی کوشش کی جا رہی ہے، عوام کے جذبات کے ساتھ کھیلنے والوں کا انجام برا ہوگا۔ انہوں نے کہا کہ وفاقی وزیر کے بیان کو متنازع بنا کر پھر بھارت کو خوش کرنے کی کوشش کی جا رہی ہے، (ن ) لیگ ملک پر بدنما داغ ہے۔ انہوں نے کہا کہ میاں مفرور کے پاگل پن کیلئے ملک کو داؤ پر لگانے کی اجازت نہیں دیں گے، آپ ہندوستان کی سلیکٹ کردہ ہیں، اس لیے آپ عوام کو قبول نہیں۔