وزیراعلیٰ عثمان بزدار سے بلوچستان کے وزراء ظہور احمد بلیدی اور حاجی محمد خان اتمن خیل کی قیادت میں وفد کی ملاقات

عثمان بزدار کا پاکستان کی ترقی کیلئے جذبہ قابل تحسین، پنجاب بلوچستان کو قریب لانے میں کردار ناقابل فراموش ہے‘ظہور احمد بلیدی عثمان بزدار کی قیادت میں پنجاب نے حقیقی معنوں میں بڑے بھائی کا کردار ادا کیا ہے‘حاجی محمد خان اتمن خیل پنجاب کی 8 ویمن یونیورسٹیوں میں بلوچستان کی طالبات کیلئے کوٹے میں اضافہ ، 360 سیٹیں مختص‘عثمان بزدار گوادر میں پنجاب ہاؤس، تفتان میں زائرین کیلئے سنٹر ، خاران میںٹیکنیکل کالج ، تربت میں ہسپتال بنایا جا رہا ہے

بدھ نومبر 21:06

وزیراعلیٰ عثمان بزدار سے بلوچستان کے وزراء ظہور احمد بلیدی اور حاجی ..
لاہور(اُردو پوائنٹ اخبارتازہ ترین - این این آئی۔ 25 نومبر2020ء) وزیراعلیٰ پنجاب سردارعثمان بزدار سے وزیراعلیٰ آفس میں بلوچستان کے وزیر خزانہ ظہور احمد بلیدی اور وزیر صنعت حاجی محمد خان طور اتمن خیل کی قیادت میں وفد نے ملاقات کی۔ وفد نے بلوچستان کے عوام کی فلاح و بہبود کیلئے مثالی اقدامات پر وزیراعلیٰ پنجاب سردار عثمان بزدار کا شکریہ ادا کیا۔

وزیر خزانہ بلوچستان ظہو راحمد بلیدی نے کہا کہ وزیراعلیٰ عثمان بزدار کا پاکستان کے استحکام او رترقی کیلئے مل کر کام کرنے کا جذبہ قابل تحسین ہے اور انہوں نے پنجاب اور بلوچستان کو قریب لانے میں ناقابل فراموش کردار ادا کیا ہے۔ عثمان بزدار نے بلوچستان کے عوام کے دل جیت لئے ہیں۔ وزیر صنعت بلوچستان حاجی محمد خان طور اتمن خیل نے کہا کہ صوبائی ہم آہنگی کے فروغ کیلئے وزیراعلیٰ عثمان بزدار کی خدمات قابل تحسین ہیںاور عثمان بزدار نے حقیقی معنوں میں بڑے بھائی کا کردار ادا کیا ہے۔

(جاری ہے)

وزیراعلیٰ پنجاب عثمان بزدار نے وفد سے گفتگو کرتے ہوئے کہا کہ پنجاب کے ساتھ بلوچستان کی ترقی بھی عزیز ہے اور یہی وجہ ہے کہ پنجاب کی سرکاری اور نجی یونیورسٹیوں میں بلوچستان کے طلباء کا کوٹہ مخصوص ہے۔ پنجاب کی 8 ویمن یونیورسٹیوں میں بلوچستان کی طالبات کیلئے کوٹے میں اضافہ کر دیا ہے ۔ ویمن یونیورسٹیوں میں بلوچستان کی طالبات کیلئے 360 سیٹیں مختص کر دی ہیں۔

ویمن یونیورسٹیوں کے ہر ڈگری پروگرام میں بلوچستان کی طالبات کیلئے 2 نشستیں مختص ہوںگی۔ انہوں نے کہا کہ پنجاب حکومت نے خیر سگالی کے طور پر بلوچستان میں مختلف منصوبے شروع کئے ہیں۔ حکومت پنجاب گوادر میں پنجاب ہاؤس اور تفتان میں زائرین کیلئے سنٹر بنارہی ہے۔ خاران میں حکومت پنجاب کی طرف سے ٹیکنیکل کالج بنایا جا رہا ہے۔ موسیٰ خیل میں بینک آف پنجاب کی برانچ، ریسکیو 1122سنٹر، کالج کیلئے ٹرانسپورٹ اور دیگر سہولتیں فراہم کررہے ہیں۔

تربت میں ہسپتال بھی بنا رہے ہیں۔ عثمان بزدار نے کہا کہ پنجاب حکومت بلوچستان کی تعمیر و ترقی میں بھرپور کردار ادا کر رہی ہے۔ بلوچستان سے آنے والے لوگ ہمارے لئے قابل احترام ہیں۔ ہمیشہ بلوچستان جا کر محبت دیکھی ، پنجاب بھی محبتیں نچھاورکررہا ہے اور بڑے بھائی کی حیثیت سے پنجاب بلوچستان کی ہر مدد اورمعاونت کے لئے ہروقت تیار ہے۔

لاہور شہر میں شائع ہونے والی مزید خبریں:

Your Thoughts and Comments