پی ڈی ایم عناصرکی قسمت میں صرف رونا ہی لکھا ہے اوریہ لوگ 13دسمبر کے بعد بھی روتے رہیں گے، وزیراعلی پنجاب عثمان بزدار

لاہور۔ (اُردو پوائنٹ اخبارتازہ ترین - اے پی پی۔ 05 دسمبر2020ء) : وزیراعلی پنجاب سردار عثمان بزدار سے وزیر اعلی آفس میں وزیراعظم کے معاون خصوصی برائے یوتھ افیئرز عثمان ڈارنے ملاقات کی جس میں باہمی دلچسپی،سیاسی معاملات اورٹائیگرز فورس کے امور پر تبادلہ خیال کیا گیا۔ملاقات میں وزیراعظم عمران خان کے دورہ سیالکوٹ کے انتظامات کے بارے میں بھی بات چیت کی گئی۔

وزیر اعلی عثمان بزدار نے کہا کہ سیاست عوام کی بے لوث خدمت کو کہتے ہیں،ناکہ انتشاراورافراتفری پھیلانے کو۔عوام کے مسترد شدہ عناصر ترقی کے سفرروکنا چاہتے ہیں اوریہ ٹولہ صرف اپنی کرپشن بچانے کیلئے اکٹھا ہے۔عام آدمی کے مسائل سے ان لوگوں کا کوئی واسطہ نہیں۔انہوں نے کہا کہ حکومت عوام کو کوروناسے بچانے کیلئے اقدامات کررہی ہے۔

(جاری ہے)

بدقسمتی سے پی ڈی ایم جلسوں کے ذریعے کورونا پھیلارہی ہے۔

ان عناصرکی قسمت میں صرف رونا ہی لکھا ہے اوریہ لوگ 13دسمبر کے بعد بھی روتے رہیں گے۔انہوں نے کہا کہ حکومت جانے والی نہیں،مدت پوری کریں گے۔ٹائیگرز فورس کے نوجوان عوام کی فلاح وبہبود کیلئے سرگرم ہیں۔ ٹائیگر زفورس نے کورونا وبامیں دکھی انسانیت کی بھرپورمدد کی ہے۔وزیراعظم عمران خان پاکستان کو لوٹنے والوں کو کبھی این آر او نہیں دیں گے۔

وزیراعظم کے معاون خصوصی برائے یوتھ افیئرزعثمان ڈار نے وزیراعلی عثمان بزدار کوکامیاب نوجوان پروگرام اورٹائیگر زفورس کی کارکردگی سے آگاہ کیااور وزیر اعظم عمران خان کے دورہ سیالکوٹ کی تیاریوں کے حوالے سے انتظامات کے بارے میں بھی بریف کیا ۔عثمان ڈار نے کہا کہ کامیاب نوجوان تحریک انصاف کی حکومت کا فلیگ شپ پروگرام ہے۔نوجوانوں کو اس پروگرام کے ذریعے بااختیار بنایا جارہاہے۔

ٹائیگرز فورس کے نوجوان ہماری طاقت ہیں۔ٹائیگرزفورس نے عملی میدان میں عوام کی خدمت کر کے نئی مثال قائم کی ہے۔پی ڈی ایم ملک دشمن قوتوں کا ایجنڈا لے کر چل رہی ہے۔اپوزیشن ملک کی ترقی اور عوام کی خوشحالی کو اپاہج کرنے کی سازشوں میں مصروف ہے۔عقل سے ناپید اپوزیشن کے جعلی لیڈروں کو صورتحال کا ادراک نہیں۔