پی ڈی ایم انصاف پر مبنی نہیں مرضی کے فیصلے چاہتی ہے ،الیکشن کمیشن کے باہر احتجاج سیاسی ضرورت کے سواکچھ نہیں ‘ چوہدری سرور

لاہور(اُردو پوائنٹ اخبارتازہ ترین - این این آئی۔ 19 جنوری2021ء) گور نر پنجاب چوہدری محمدسرور نے کہا ہے کہ اداروں کوریموٹ کنٹرول سے چلانے کا دًور گزر چکا ،اب ادارے آزاد ہیں،پی ڈی ایم انصاف پر مبنی نہیں مرضی کے فیصلے چاہتی ہے ،الیکشن کمیشن کے باہر پی ڈی ایم کا احتجاج ان کی سیاسی ضرورت کے سواکچھ نہیں ،اداروں پر دبائو بڑھانے کا اپوزیشن کا منصوبہ ایک بار پھر ناکام ہوگا،پنجاب میں کورونا وباء کے دوران میڈیکل یونیورسٹیز نے ٹیلی میڈیسن سنٹرز کے ذریعے عوام کو جو صحت کی سہولت فراہمی کی ہے وہ قابل ستائش ہے۔

ان خیالات کا اظہار انہوں نے گور نر ہائوس لاہور میں جرنل آف پاکستان سوسائٹی آف انٹرنل میڈیسن کی افتتاحی تقریب سے خطاب اور میڈیا سے گفتگو کر رہے تھے ۔ اس موقعہ پر صوبائی وزیر ہائر ایجوکیشن یاسر سرفراز ہمایوں، سیکرٹری ہیلتھ کیپٹن (ر)عثمان،وائس چانسلریونیورسٹی آف ہیلتھ سائنسز پروفیسرڈاکٹر جاوید اکرم، وائس چانسلر کنگ ایڈورڈ میڈیکل یونیورسٹی پروفیسر خالد مسعود گوندل ،ڈاکٹر صومیہ اقتداراور پروفیسر عزیز الرحمن سمیت دیگر بھی شر یک ہوئے۔

(جاری ہے)

گور نر پنجاب چوہدری محمدسرور نے کہا کہ موجودہ حکومت اداروں کو سیاسی مداخلت سے مکمل پاک کرنے کی پالیسی پر گامزن ہے۔ اُنہوں نے کہا کہ اپوزیشن کافی عرصے سے احتجاج کی سیاست کر رہی ہے او ر ہر بار ان کو حکومت کے خاتمے کی امید لگ جاتی ہے مگر 2023تک حکومت کے خاتمے کی ان کی آس بار بار ٹوٹے گی۔ایک صحافی کے سوال کے جواب میں چوہدری محمدسرور نے کہا کہ اپوزیشن اپنی بقاء کے لیے سیاسی ماحول کو گرم رکھنا چاہتی ہے۔

اُنہوں نے کہا کہ وزیر اعظم عمران خان کی قیادت میں پارٹی چٹان جیسی مضبوط ہے، کوئی شک نہیں کہ تحریک انصاف عوام کے اعتماد اور عمران خان کی جدوجہد سے اقتدار میں ہے ،حکومت ملک کو آگے جبکہ اپوزیشن پیچھے لیکر جانا چاہتی ہے۔پنجاب آب پاک اتھارٹی کے حوالے سے گور نر پنجاب نے کہا کہ اس میں کسی قسم کی سیاسی تفر یق نہیں ہوگی ،ہم پنجاب کے تمام حلقوں میں عوام کو پینے کے صاف پانی کی فراہمی کیلئے بھر پور کام کریں گے اورالحمد اللہ ہم نے پنجاب آب پاک اتھارٹی کے منصوبوں کو مزید تیزکر دیا ہے۔

تقریب سے خطاب کے دوران گور نر پنجاب چوہدری محمدسرور نے کہا کہ پنجاب میں کورونا وباء کے دوران میڈیکل یونیورسٹیز نے ٹیلی میڈیسن سنٹرز کے ذریعے عوام کو جو صحت کی سہولت فراہمی کی ہے وہ قابل ستائش ہے۔ اُنہوں نے کہا کہ نوجوانوں کو روزگار کی فراہمی اور معیشت کی مضبوطی کیلئے یونیورسٹیوں کا انڈسٹری کے ساتھ اشتراک کرنا چاہیے ،میں آج دعوے سے کہہ سکتا ہوں کہ پنجاب میں ہم نے یونیورسٹیز میں سیاسی مداخلت کو مکمل ختم کر دیا ہے۔

پروفیسر ڈاکٹر جاوید اکرم نے کہا کہ پاکستان میں اس وقت صرف 113 جبکہ برطانیہ میں 395 سائنسی جریدے شائع ہورہے ہیں میڈیکل کے شعبے میں محض 3 پاکستانی جریدے امپیکٹ فیکٹر رکھتے ہیں ۔ اُنہوں نے کہا کہ یونیورسٹی آف ہیلتھ سائنسز کے زیراہتمام پہلی مرتبہ میڈیکل جرنلزم میں ماسٹر ڈگری پروگرام شروع کر رہے ہیں۔ اس موقعہ پر ڈاکٹر صومیہ اقتدار نے پاکستان سوسائٹی آف انٹرنل میڈیسن کے زیراہتمام کئے گئے اقدامات پر بریفنگ دی۔ قبل ازیں گور نر پنجاب چوہدری محمدسرور سے گور نر ہائوس میں تحر یک انصاف کے ایم این اے صد اقت عباسی نے بھی ملاقات کی ہے۔