آدھی مدت اقتدار گزارنے کے باوجود پی ٹی آئی کی حکومت بے سمت ، دعوے وعدے کاغذی ثابت ہوئے‘ سراج الحق

لاہور(اُردو پوائنٹ اخبارتازہ ترین - این این آئی۔ 03 مارچ2021ء) امیر جماعت اسلامی سراج الحق نے کہا ہے ملک کی کشتی بھنور میں ہے، آدھی مدت اقتدار گزارنے کے باوجود پی ٹی آئی کی حکومت بے سمت ، دعوے وعدے کاغذی ثابت ہوئے۔ اسمبلیاں اکھاڑوں کا منظر پیش کررہی ہیں ، سیاسی اخلاقیات کا جنازہ نکل چکا۔ عوامی نمائندوں کا سینٹ الیکشن کے دوران کنڈکٹ غیر سنجیدہ رہا، خدارا جمہوریت اور جمہوری اداروں کو تماشا نہ بنایا جائے۔

مفادات اور مک مکاؤ کی سیاست میں نقصان ملک اور قوم کا ہی ہورہا ہے۔ غریب روٹی کے لقمے کے لیے ترس رہا ہے۔ تبدیلی حکومت نے عوام کو سب سے زیادہ دھوکہ دیا۔ نوجوان مایوس ، کسان پریشان اور مزدور بے حال ہیں۔ وزیراعظم کو بتانا چاہتا ہوں کہ ایک کروڑ نوکریاں اور پچاس لاکھ گھر تعمیر کرنے کاوعدہ پورا کرنے کے لیے ان کے پاس وقت نہیں رہا۔

(جاری ہے)

مزید یوٹرنز لینے کا بھی ٹائم گزر چکا ، قوم جواب مانگ رہی ہے۔

گزشتہ سات دہائیوں میں ملک کے ریسورسز کو ذاتی فائدے کے لیے استعمال کیا گیا۔ عوام جاگیرداروں اور سرمایہ داروں کو مزید برداشت کرنے کو تیار نہیں۔ ملک میں بلدیاتی الیکشن ہوئے نہ ہی الیکٹوریل ریفارمز ہو سکیں۔ مہنگائی، بیروزگاری، غربت ، ناخواندگی، غیر ملکی قرضے پی ٹی آئی کی حکومت کے اب تک کے تحائف ہیں جو عوام میں وافر مقدار میں تقسیم کیے گئے۔

آزمائے ہوئے وڈیروں اور استعمار کے نمائندوں کا وقت گزر چکا، جماعت اسلامی ملک کی تقدیر سنوارے گی۔ان خیالات کا اظہار انہوں نے منصورہ میں مرکزی نظم کے اجلاس کی صدارت کرتے ہوئے کیا۔ آٹھ گھنٹوں کی طویل نشست میں مرکزی قائدین نے ملک کی سیاسی صورتحال، داخلی اور خارجی سطح پر درپیش چیلنجز، لوکل گورنمنٹ الیکشنز ، جماعت اسلامی کی تنظیمی صورتحال اور تیاریوں پر بحث و مباحثہ کیا اور مستقبل کا لائحہ عمل تیار کیا۔

اجلاس میں فیصلہ کیا گیا کہ جماعت اسلامی حکومت کی عوام دشمن پالیسیوں کے خلاف جاری تحریک میں آنے والے دنوں میں مزید تیزی لائے گی اور مختلف شہروں میں بھرپور جلسے اور ریلیاں منعقد ہوں گی۔ امیر جماعت نے مرکزی قائدین کو ہدایات جاری کیں کہ وہ ہر سطح پر عوام سے رابطے بڑھائیں اور ملک بھر میں جماعت اسلامی کے کارکنان اور سپورٹرز کو متحرک کریں۔

آنے والا وقت جماعت اسلامی کا ہے کیونکہ سالہاسال سے عوام کی گردنوں پر سوار اشرافیہ نے قوم کو سوائے دھوکہ اور فراڈ کے اور کچھ نہیں دیا۔ قائدین جماعت سے گفتگو کرتے ہوئے سراج الحق کا کہنا تھا کہ جماعت اسلامی کے بار بار کے مطالبات کے باوجود ملک میں الیکشن ریفارمز کے لیے کوئی سنجیدہ کوشش نہیں ہوئی۔ بلدیاتی الیکشن نہ ہونے کی وجہ سے نچلی سطح پر مسائل کا انبار منہ کھولے کھڑا ہے۔

قومی اور صوبائی اسمبلیوں میں موجود اشرافیہ عوام سے لاتعلق اور غیر سنجیدہ سیاست میں الجھی ہوئی ہے۔ معیشت تباہی کے دہانے پر ہے۔ ملک کی نظریاتی اساس پر حملے ہو رہے ہیں۔ کشمیر کا سودا ہوچکا ہے اور بلوچستان اورسابقہ فاٹا کے علاقوں میں دشمن کی سازشیں جاری ہیں۔ اس کلی صورتحال میں حکمران پی ٹی آئی یا تو اپنے ہی ممبران کی بغاوت کو کچلنے میں مصروف ہے یا اپوزیشن کو کارنز کرنے چکروں میں ہے۔

دوسری جانب پی ڈی ایم کے نام سے قائم اپوزیشن اتحاد بھی عوامی مسائل سے بالکل غافل ہے۔سراج الحق نے کہاکہ قوم نے سب کو آزما لیا اور بدلے میں غربت و بے روزگاری دیکھی ۔ لاکھوں لوگ فٹ پاتھوں پر سوتے ہیں ۔ عوام میں آٹا چینی گھی خریدنے کی سکت نہیں رہی ۔ بچے ہوٹلوں اور فیکٹریوں میں مزدوریاں کررہے ہیں ۔ سرکاری سکولوں میں تعلیم ناقص اور پرائیویٹ اداروں میں پہنچ سے باہر ہے ۔ صحت کے شعبہ میں بہتری نہیں آئی ۔ حکومت عوامی فلاح کا کوئی پروگرام متعارف نہیں کراسکی ۔ قرضوں کے سہارے معیشت کب تک چلے گی ۔ ملک کا دیوالیہ نکل چکاہے ۔ پاکستان کو صالح اور ایماندار قیادت کی ضرورت ہے ۔ جماعت اسلامی واحد آپشن ہے ۔