پنجاب بھرکے ڈاکٹرزکی پیشہ وارانہ صلاحیتوں میں اضافہ کیلئے جدیدتربیتی کورسزکروائے جائیں گے‘یاسمین راشد

ڈاکٹرز،نرسزاور پیرامیڈیکل سٹاف نے کوروناکے چاروں ادوارکے دوران بے مثال فرائض سرانجام دئیے ہیں‘وزیرصحت پنجاب

منگل 28 ستمبر 2021 16:27

پنجاب بھرکے ڈاکٹرزکی پیشہ وارانہ صلاحیتوں میں اضافہ کیلئے جدیدتربیتی ..
لاہور(اُردو پوائنٹ اخبارتازہ ترین - این این آئی۔ 28 ستمبر2021ء) وزیر صحت پنجاب ڈاکٹریاسمین راشدکی زیر صدارت محکمہ سپیشلائزڈ ہیلتھ کئیراینڈ میڈیکل ایجوکیشن میں اعلیٰ سطح کا اجلاس منعقد ہوا،جس میں سیکرٹری محکمہ سپیشلائزڈ ہیلتھ کئیراینڈ میڈیکل ایجوکیشن ڈاکٹراحمدجاویدقاضی،سیکرٹری محکمہ پرائمری اینڈ سیکنڈری ہیلتھ کئیرعمران سکندربلوچ،سپیشل سیکرٹری محمد اجمل بھٹی،ایڈیشنل سیکرٹری ڈاکٹرآصف طفیل،ایڈیشنل سیکرٹری سٹاف عثمان خالد،چیف پلاننگ آفیسرعبدالحق بھٹی،ڈی جی نرسنگ،پروفیسرجاویدچوہدری ودیگرافسران نے شرکت کی۔

صوبائی وزیر صحت ڈاکٹریاسمین راشدنے اجلاس کے دوران کمیونٹی مڈوائفری سکول کی عمارت کو نرسنگ سکول میں منتقلی کیلئے اقدامات اور ڈاکٹرزکی جدیدپیشہ وارانہ تربیت کیلئے مختلف ماڈلزکا جائزہ لیا۔

(جاری ہے)

سپیشل سیکرٹری محمد اجمل بھٹی نے وزیر صحت ڈاکٹریاسمین راشدکو ڈاکٹرزکی پیشہ وارانہ تربیت کیلئے مختلف ماڈلز بارے تفصیلی بریفنگ دی۔صوبائی وزیر صحت ڈاکٹریاسمین راشدنے کہاکہ پنجاب بھرکے ڈاکٹرزکی پیشہ وارانہ صلاحیتوں میں اضافہ کیلئے جدیدتربیتی کورسزکروائے جائیں گے۔

حال ہی میں صوبہ بھرکے مختلف سرکاری ہسپتالوں کے ڈاکٹرزکو انسٹی ٹیوٹ آف پبلک ہیلتھ میں جدید تربیت کروائی گئی ہے۔آئندہ ڈاکٹرزکو ایم پی ڈی ڈی جیسے مختلف اداروں سے جدیدٹریننگ کورسزکروائے جائیں گے۔ ڈاکٹرزکیلئے فنانشل مینجمنٹ،ہیومن ریسارس مینجمنٹ،ایڈمنسٹریشن مینجمنٹ،ریسرچ پیپرز اور انفارمیشن ٹیکنالوجی بارے جدید کورسزڈیزائن کئے جارہے ہیں۔

صوبائی وزیر صحت نے کہاکہ ڈاکٹرزہمارااثاثہ ہیں۔ڈاکٹرز،نرسزاور پیرامیڈیکل سٹاف نے کوروناکے چاروں ادوارکے دوران بے مثال فرائض سرانجام دئیے ہیں۔وزیراعظم عمران خان کے ویژن کے مطابق صحت کے نظام میں انتظامی اصلاحات کے ذریعے حقیقی تبدیلی کا خواب شرمندہ تعبیر کیا جاسکتاہے۔ڈاکٹریاسمین راشد نے کہاکہ سپیشل سیکرٹری محمد اجمل بھٹی ڈاکٹرزکی جدید تربیت کے حوالہ سے فوکل پرسن ہوں گے۔

سرکاری ہسپتالوں کے ساتھ ساتھ ڈاکٹرزکو بھی پیشہ وارانہ طورپرمضبوط دیکھناچاہتے ہیں۔صوبائی وزیر صحت نے مزیدکہاکہ سرکاری ہسپتالوں کو عام آدمی کیلئے بہترین علاج گاہیں بنانے کی کوشش کررہے ہیں۔ماضی کے کسی بھی حکمران نے پنجاب کی عوام کو صحت کے شعبہ میں ریلیف نہیں دیا۔وزیراعلیٰ پنجاب سردارعثمان بزدارکی ہدایت پر پنجاب کی عوام کو بہترطبی سہولیات کی فراہمی کیلئے کوشاں ہیں۔

لاہور شہر میں شائع ہونے والی مزید خبریں:

Your Thoughts and Comments